2025-yilda Rossiyadan O‘zbekistonga olib kirilgan benzin hajmi 510 ming tonnani tashkil etdi. O‘zbekiston Rossiyadan temir yo‘l orqali yetkazib beriladigan yoqilg‘ining eng yirik iste’molchi davlatlaridan biriga aylandi. Bu haqda «Kommersant» nashri xabar berdi.
Ma’lumotlarga ko‘ra, 2025-yilda Rossiyadan temir yo‘l orqali jami 2,6 mln tonna benzin eksport qilingan. Ushbu hajmning salmoqli qismi Markaziy Osiyo mamlakatlariga to‘g‘ri kelgan. O‘zbekistondan tashqari Qirg‘iziston 526 ming tonna, Mongoliya 820 ming tonna, Tojikiston esa 406 ming tonna yoqilg‘i import qilgan.
Yil oxiriga kelib benzin yetkazib berish hajmlarida pasayish qayd etilgan. Xususan, dekabr oyida temir yo‘l orqali eksport 209 ming tonnani tashkil etib, noyabrga nisbatan 22 foizga, 2024-yil dekabri bilan solishtirganda esa 36 foizga qisqargan. Mutaxassislar bu holatni Markaziy Osiyo davlatlari uchun belgilangan bojxona bojsiz benzin importi bo‘yicha yillik kvotalarning tugashi bilan izohlamoqda.
Rossiyaning dengiz orqali benzin eksporti ham 2025-yilda sezilarli darajada kamaygan. O‘tgan yilga nisbatan ko‘rsatkich 40 foizga qisqarib, 2,1 mln tonnani tashkil etgan. Bunga bir necha oy davom etgan xorijga benzin yetkazib berishga oid cheklovlar sabab bo‘lgan. Shunga qaramay, Rossiya benzini uchun asosiy dengiz bozorlari sifatida Misr va Turkiya yetakchi yo‘nalish bo‘lib qolgan.
Qaynoq24.uz «O‘zbekneftgaz» birjada benzin yetkazib berishni oshirishi haqida yozgan edi.
