2025-yilda subflagman smartfonlar segmenti taqdimotga boy bo‘ldi. Ishlab chiqaruvchilar flagman darajasidagi ekran, kamera va unumdorlikni ancha qulay toifaga olib tushdi. Quyida aynan shu yil bozorda eng ommabop va muvaffaqiyatli bo‘lgan besh model haqida batafsil ma’lumot beramiz.
Xiaomi 15T
Xiaomi’ning eng ommabop “T” seriyasiga mansub ushbu model kuchli balans bilan ajralib turadi. Qurilma 120 gersli AMOLED displeyga ega bo‘lib, yuqori yorqinlik tufayli quyoshda ham qulay foydalaniladi. MediaTek’ning zamonaviy protsessori tizimning tez ishlashini va og‘ir o‘yinlarda ham barqarorlikni ta’minlaydi.
Kamera imkoniyatlari ham e’tiborga molik: optik stabilizatsiyaga ega asosiy modul, optik zumli telekamera va keng burchakli sensor kundalik hamda ijodiy suratga olish uchun yetarli. Katta sig‘imli akkumulyator va tezkor quvvatlash esa uzoq foydalanish imkonini beradi. Xiaomi muxlislari uchun juda to‘g‘ri tanlov.
Google Pixel 9a
Minimalistik dizayn va toza Android tizimini qadrlovchilar uchun eng maqbul variant. Qurilma ixcham o‘lchami tufayli bir qo‘lda ishlatishga qulay. P-OLED ekran silliq animatsiya va yuqori yorqinlikni ta’minlaydi.
Pixel 9a’ning asosiy ustunligi — kamera algoritmlari. Surat va videolar deyarli har qanday yorug‘lik sharoitida tabiiy va tiniq chiqadi. Uzoq muddatli Android yangilanishlari va xavfsizlik patchlari esa ushbu modelni yillar davomida dolzarb saqlaydi.
OnePlus 13R
OnePlus’ning bu modeli unumdorlikka urg‘u beradi. Katta LTPO AMOLED displey, yuqori yangilanish chastotasi va kuchli flagman darajasidagi protsessor uni o‘yin ishqibozlari uchun jozibador qiladi.
Kamera tizimi universal: kundalik suratga olish, portret va optik zumda yaxshi natija beradi. Tezkor quvvatlashga ega katta akkumulyator esa smartfonni qisqa vaqtda to‘liq ishga tayyor holatga keltiradi. Kuch va tezlikni istaganlar uchun ideal subflagman.
Samsung Galaxy S25 FE
Samsung’ning Fan Edition seriyasi 2025 yilda ham ommabopligini yo‘qotmadi. Qurilma ranglari to‘yingan, aniq tasvir beruvchi Dynamic AMOLED displey bilan jihozlangan. Protsessor flagman darajasida bo‘lmasa-da, kundalik vazifalar uchun yetarli darajada barqaror ishlaydi.
Kamera sifati Samsung an’analariga mos: tabiiy ranglar, yaxshi detallashtirish va sifatli video. IP68 himoyasi, simsiz quvvatlash va Samsung DeX rejimi ushbu modelni ishonchli va qulay smartfonga aylantiradi. Xitoy brendlariga ishonmaydiganlar uchun ayni muddao.
Honor 400 Pro
2025 yilning eng kuchli subflagmani sifatida ko‘rilayotgan model. Juda yorqin AMOLED displey, flagman darajasidagi Snapdragon protsessori va katta sig‘imli zamonaviy akkumulyator bilan jihozlangan.
Kamera tizimi esa alohida e’tiborga loyiq: yuqori aniqlikdagi asosiy sensor, optik zumli telekamera va keng burchakli modul har qanday sharoitda yuqori sifatli suratga olish imkonini beradi. Himoya darajasi, simsiz quvvatlash va to‘liq funksional imkoniyatlar Honor 400 Pro’ni “narx–imkoniyat” nisbatida juda kuchli o‘yinchiga aylantiradi.
Qaynoq24.uz Samsung kompaniyasining omadsiz smartfonlari haqida yozgan edi.
