2025-yil bukiluvchi smartfonlar uchun burilish davri bo‘ldi. Agar 2024-yil asosan kichik yangilanishlar bilan esda qolgan bo‘lsa, joriy yilga kelib bukiluvchi qurilmalar to‘liq shakllangan, ishonchli va flagman darajasidagi mahsulotga aylandi. Endilikda ular nafaqat texnologik tajriba, balki klassik flagman smartfonlarga jiddiy raqobatchi sifatida qaralmoqda.
GizmoChina nashrining 2025-yil yakunlari bo‘yicha e’lon qilgan reytingiga ko‘ra, Samsung, Huawei va Oppo kabi yirik ishlab chiqaruvchilar bukiluvchi smartfonlar bozorini yangi darajaga olib chiqdi. Kamera sifati, mustahkamligi, dizayn, avtonomlik va sun’iy intellekt imkoniyatlari bu yil asosiy mezonlarga aylandi.
Samsung Galaxy Z Fold 7
Samsung Galaxy Z Fold 7 2025-yilning eng mukammal bukiluvchi smartfoni sifatida e’tirof etildi. Qurilma 215 gramm og‘irlik bilan Fold seriyasidagi eng yengil modelga aylandi. Bunga titan bilan mustahkamlangan korpus va yangilangan FlexHinge mexanizmi sabab bo‘ldi.
8 dyuymli asosiy ekran yanada ingichka ramkalar bilan jihozlangan. Ekran osti kamerasi olib tashlanib, o‘rniga ancha tiniq 10 megapikselli kamera o‘rnatilgan. Eng katta yangilik esa 200 megapikselli flagman darajadagi kamera bo‘lib, u oddiy smartfonlar bilan teng surat sifatini ta’minlaydi.
One UI 8 va Android 16 asosida ishlovchi qurilma Galaxy AI yordamida ko‘p oynali rejim, yonma-yon tahrirlash va Gemini Live bilan kontekstli muloqot imkoniyatlarini taklif etadi. Z Fold 7 ko‘pchilik tomonidan mobil ish stansiya sifatida baholanmoqda.
Samsung Galaxy Z Flip 7
Galaxy Z Flip 7 Samsung‘ning bukiluvchi “qopqoqcha” formatini yangi bosqichga olib chiqdi. 4,1 dyuymli FlexWindow tashqi ekrani endi mustaqil telefon kabi ishlaydi. Foydalanuvchilar ilovalarni ishga tushirishi, xabarlarga javob berishi va sun’iy intellekt bilan muloqot qilishi mumkin.
Flip 7 seriya tarixida ilk bor Samsung DeX’ni qo‘llab-quvvatlaydi. Bu esa uni monitorga ulab, mini-kompyuter sifatida ishlatish imkonini beradi. 4300 mA/soatli akkumulyator, ingichka dizayn va yuqori unumdorlik Flip 7’ni nafaqat nostaljik, balki haqiqiy flagman qurilmaga aylantirdi.
Huawei Mate X7
Huawei Mate X7 2025-yilda eng jasur apparat yechimlariga ega bukiluvchi smartfonlardan biri bo‘ldi. Qurilma 50 MP asosiy kamera, o‘zgaruvchan diafragma, 3,5 karra optik zumli telefoto va Red Maple rang sensori bilan jihozlangan.
Bukiluvchi OLED ekran 2500 nitgacha yorqinlikni ta’minlaydi. HarmonyOS operatsion tizimi keng ekran imkoniyatlaridan samarali foydalanadi. 5600 mA/soatli batareya va titan bilan mustahkamlangan korpus Mate X7’ni eng bardoshli bukiluvchi modellardan biriga aylantirdi.
Oppo Find N5
Oppo Find N5 2025-yildagi eng qulay bukiluvchi smartfonlardan biri sifatida e’tirof etildi. Uning asosiy ustunligi — deyarli sezilmaydigan bukilish chizig‘i va aviatsiya darajasidagi titan menteşa mexanizmi.
8,12 dyuymli LTPO ekran stilus qo‘llab-quvvatlaydi. Hasselblad bilan hamkorlikda ishlab chiqilgan kamera tizimi, jumladan 6 karra optik zumli periskop kamera, past yorug‘likda ham yuqori sifatni ta’minlaydi. 5600 mA/soatli silikon-uglerod batareya tezkor simli va simsiz quvvatlashni qo‘llab-quvvatlaydi.
Huawei Pura X
Huawei Pura X an’anaviy flip smartfonlar haqidagi tasavvurni o‘zgartirdi. 16:10 nisbatdagi 6,3 dyuymli ichki ekran va kvadrat shakldagi 3,5 dyuymli tashqi OLED displey qurilmaga o‘ziga xos dizayn berdi.
50 MP RYYB asosiy kamera, 40 MP ultra keng kamera va 3,5 karra zumli telefoto moduli flagman darajasidagi suratga olish imkonini beradi. IPX8 suvdan himoya, sun’iy yo‘ldosh aloqasi va 66 Vt tezkor quvvatlashga ega 4720 mA/soatli batareya Pura X’ni eng kuchli flip smartfonlardan biriga aylantirdi.
Qaynoq24.uz 2025-yilning eng yaxshi smartfonlari e’lon qilingani haqida yozgan edi.
