Jizzax viloyatidagi tumanlardan birida Favqulodda vaziyatlar (FVV) bo‘limi boshlig‘i pora olishda gumonlanib qo‘lga olindi. Bu haqda DXX xabar bermoqda.
Ma’lum qilinishicha, u o‘z xizmat mavqeidan foydalanib, 2025-yil sentabr oyida mahalliy tadbirkorning qurilishi rejalashtirilgan ko‘p qavatli uy loyihasini tasdiqlab berish evaziga $200 olgan.
Oradan ko‘p o‘tmay, shu tadbirkor aholiga qulaylik yaratish maqsadida xuddi shu joy yaqinida xususiy maktab qurish uchun loyiha hujjatlarini tasdiqlatmoqchi bo‘ladi. Bu safar mansabdor shaxs undan 6 mln so‘m talab qiladi.
DXX va prokuratura xodimlari o‘tkazgan tezkor tadbirda, tuman FVV bo‘limi boshlig‘i so‘ralgan pulni turmush o‘rtog‘i orqali olayotgan vaqtda ushlandi.
Hozirda unga nisbatan Jinoyat kodeksining 210-moddasi (pora olish) 2-qismi “a” va “v” bandlari bo‘yicha jinoyat ishi qo‘zg‘atilgan.
Eslatib o‘tamiz, Qaynoq24.uz nashri Samarqand va Qashqadaryoda yer sotish bo‘yicha noqonuniy holatlar aniqlangani haqida yozgan edi.
