Telegram ilovasi bir nechta muhim yangiliklarni e’lon qildi. Endi foydalanuvchilar hikoyalarda jonli efir olib borishi, muntazam xabarlar yuborishni yo‘lga qo‘yishi, yangi sovg‘alar uchun auksionlarda qatnashishi va yangilangan dizayn imkoniyatlaridan foydalanishi mumkin.
Jonli efirlar
Endi har bir foydalanuvchi o‘zining hikoyalarida jonli efir boshlashi mumkin. Tomoshabinlar efir davomida chatda izoh qoldiradi. Istasa, izohni pullik ko‘rinishda ajratib ko‘rsatishi mumkin. Efir davomida to‘plangan yulduzlar pastki o‘ng burchakda ko‘rinadi. Translyatsiya shaxsiy akkaunt nomidan yoki hikoya nashriga ruxsati bor guruh va kanallar nomidan amalga oshiriladi.
Kontent yaratuvchilari RTMP-uloqmalar (OBS, XSplit) orqali ham efirga chiqishi mumkin. Izohlarni boshqarish, pullik izohlarni yoqish yoki moderator tayinlash imkoniyati ham qo‘shildi.
Muntazam xabarlar
Endi kechiktirilgan xabarlar uchun takrorlanish intervali sozlanadi. Masalan, har kuni, haftada bir marta yoki oyda ikki marta yuboriladigan eslatmalar yaratish mumkin. Buning uchun xabar yuborish tugmasini bosib turish kifoya.
Sovg‘alar auksioni
Telegramdagi noyob sovg‘alar endi maxsus auksion orqali tarqatiladi. Foydalanuvchilar bir necha raund davomida yulduzlar bilan taklif berishadi. Eng yuqori taklif egasi sovg‘aning birinchi raqamli nusxasini oladi. Har bir raunddan keyin eng yuqori takliflar g‘olib bo‘ladi, qolganlari keyingi raundga o‘tadi. Auksion tugagach, sovg‘alar tarqatiladi, yutuqsiz takliflar esa foydalanuvchilarga qaytariladi.
Auksion orqali sotiladigan barcha sovg‘alar maxsus “Auksion” belgisiga ega bo‘ladi.
Yangilangan dizayn
iOS versiyasida “suyuq shisha” effekti yanada kengaytirildi — profillar, sozlamalar va biriktirma menyulari endi yanada zamonaviy ko‘rinishda. Android’da yangi minimalistik matn kiritish maydoni va yumshoq xiralik animatsiyalari paydo bo‘ldi.
Yangi funksiyalar 19-noyabr 2025-yildan boshlab taqdim etildi.
Avvalroq Qaynoq24.uz nashri Apple Mac Pro yangilanishini to‘xtatgani haqida yozgan edi.
