Suriya Alavit ozchiligi mamlakatning bir necha viloyatlarida hukumatga qarshi so‘nggi yillarda kuzatilgan eng yirik norozilik namoyishlarini o‘tkazdi. Bu haqda The New York Times xabar bermoqda.
Ushbu chiqishlar dam olish kunlari Homs shahrida yuz bergan sektaaro ziddiyatning avj olishi ortidan boshlandi.
Aholining qariyb 10 foizini tashkil qiluvchi Alavitlar uzoq vaqt davomida hokimiyat tepasida bo‘lgan avvalgi tuzum tomonidan qo‘llab-quvvatlangan edi. Biroq o‘tgan yili Damashqda sunniy islomchilar hokimiyatga kelganidan so‘ng, mazkur jamoa vakillariga qarshi qasoskorona hujumlar kuchaygani, ular siyosiy jarayonlardan chetda qolayotgani aytilmoqda. Bedovin qabilalari esa yangi hukumatni asosan qo‘llab-quvvatlamoqda.
Noroziliklar Suriya O‘rta yer dengizi bo‘yidagi hududlarda, an’anaviy ravishda Alavitlar ko‘pchilikni tashkil qiladigan Latakiya va Tartus viloyatlarida, shuningdek Hama va Homsda keng tus oldi. Latakiyada xavfsizlik kuchlari namoyishlarni tarqatish uchun o‘q uzgani, ayrim Alavit mahallalari esa to‘sib qo‘yilgani haqida xabar berildi. Davlat axborot agentligi SANA ma’lum qilishicha, noroziliklar boshlanganidan so‘ng hukumat qo‘shinlari mintaqaga kiritilgan.
Suriyani qariyb 14 yillik urushdan so‘ng barqarorlashtirishga qaratilgan harakatlarga qaramay, prezident Ahmed al-Sharaa boshchiligidagi hukumat sektaaro zo‘ravonlikning qayta kuchayishini jilovlashda qiynalayotgani ta’kidlanmoqda. Hozircha rasmiy qurbonlar haqida xabar berilmagan, biroq tasdiqlangan videolavhalarda o‘q ovozlari va yaralangan odamlar aks etgan.
Qaynoq24.uz nashri Afg‘onistonda Pokiston zarbalaridan 10 kishi halok bo‘lgani haqida yozgan edi.
