Toshkentda 17 kg sintetik giyohvandlik vositalarini tarqatishga uringan jinoiy guruh fosh etildi. Bu haqda IIV xabar bermoqda.
Ichki ishlar vazirligi va Davlat xavfsizlik xizmati tomonidan o‘tkazilgan tezkor tadbirlar natijasida Toshkent shahrida giyohvand moddalarni tarqatishga uringan jinoiy guruh aniqlanib, to‘xtatildi. Dastlab, 32 yoshli shaxs boshqaruvidagi «Cobalt» avtomobilidan 83 gramm mefedron topildi.
Tadbir davomida Yunusobod tumanida 3 nafar 18 yoshli shaxs qo‘lga olindi. Ularning qo‘lidan 730 dona qadoqlangan mefedron, ijara uylaridan esa 354 dona bo‘lakka o‘ralgan Alfa PVP hamda 500 gramm mefedron aniqlandi.
Shuningdek, guruhning asosiy ombor mudiri va uning xotinidan yashash joyida 4,2 kg Alfa PVP va 9 kg mefedron topildi. Tezkor tadbirlar davomida jami 17 kg sintetik giyohvandlik vositalari, shuningdek, bir martalik 85 ming dozaga teng moddalar tarqatilishining oldi olindi.
Mazkur holat bo‘yicha Jinoyat kodeksining 273-moddasi 5-qismi bilan jinoyat ishi qo‘zg‘atildi, gumonlanuvchilarga nisbatan esa qamoq ehtiyot chorasi qo‘llandi.
Qaynoq24.uz 263,4 million so‘mlik energiya resurslaridan noqonuniy foydalanish holati fosh etilgani haqida yozgan edi.
