Samsung Galaxy S26 seriyasiga tegishli rasmiy renderlar eng katta dizayn o‘zgarishini tasdiqladi. Bu haqda Android Authority nashri xabar bermoqda.
Ma’lum bo‘lishicha, Galaxy S26 seriyasi uchun One UI 8.5 test dasturida yashirincha joylashtirilgan rasmiy tasvirlar topilgan. Ushbu renderlar yuqori sifatli bo‘lmasa-da, yangi dizaynni to‘liq tasdiqlashga yetarli.
Topilgan tasvirlarda Galaxy S26, S26+ va S26 Ultra modellari Fold 7 uslubidagi kamera orolchasiga ega. Endi alohida “floating” kameralar yo‘q — ularning o‘rnini birlashtirilgan, pillasimon kamera bloklari egallagan. Har bir linza uchun alohida dumaloq kesim qo‘llangan. Bu yechim 2021-yildan buyon Z Fold seriyasiga xos bo‘lib kelgan.
Ichki tizimdagi M1 (S26), M2 (S26+) va M3 (S26 Ultra) belgilarining avvalgi sizdirilgan ma’lumotlarga mos tushishi ham dizayn haqidagi xabarlarni tasdiqlaydi. Seriya Samsung‘ning “Miracle” loyihasi doirasida ishlab chiqilmoqda va Android 16 asosidagi One UI 8.5 bilan taqdim etilishi kutilmoqda. Galaxy S25 foydalanuvchilari esa ushbu versiyaning beta ko‘rinishini dekabrning ikkinchi haftasida olishi mumkin.
Avvalgi ma’lumotlarga ko‘ra, S26 Ultra modeli yanada yumaloq burchaklarga ega bo‘ladi. Bu uni avvalgi Note-uslubdagi keskin dizayndan uzoqlashtirib, qolgan modellarga yaqinlashtiradi.
Kompaniyaning o‘zi tomonidan sizdirilgan ushbu rasmiy renderlar ortidan endi dizayn borasidagi taxminlar tugadi. Galaxy S26 seriyasi Fold uslubidagi yagona estetika tarafdori bo‘lmoqda. Foydalanuvchilar bu dizaynni dadil deb baholaydimi yoki juda hajmli deb hisoblaydimi — bunga vaqt javob beradi.
Qaynoq24.uz Samsung Galaxy S26 qanday quvvatlanish bilan chiqishi haqida yozgan edi.
