So‘nggi uch yil davomida smartfon bozorida asosiy raqobat aynan kamera sifati atrofida kechdi. Ishlab chiqaruvchilar foto va video imkoniyatlarini nafaqat flagmanlarda, balki o‘rta sinf modellarda ham sezilarli darajada rivojlantirdi. 2023–2025-yillarda taqdim etilgan ko‘plab qurilmalar professional darajadagi surat va videolarni taklif qila boshladi. Ushbu maqolada 2023-yildan 2025-yilgacha chiqqan, yuqori foto va video sifati bilan ajralib turgan eng yaxshi kamerali smartfonlar jamlandi. Modellar tasvir sifati, optik va raqamli zum, stabilizatsiya, tungi rejim, video imkoniyatlari hamda sun’iy intellekt yordamidagi qayta ishlash mezonlari asosida baholandi.
Apple iPhone 15 Pro Max (2023)
Apple iPhone 15 Pro Max 2023-yil sentabr oyida taqdim etilgan bo‘lib, mobil fotografiya bo‘yicha bozorda yetakchi o‘rinlardan birini egalladi. Smartfon 48 MP asosiy kamera va 5 barobar optik zumga ega telefoto modul bilan jihozlangan. DXOMARK testlarida model 154 ball to‘plab, eng yuqori natijalardan birini qayd etdi.
Kunduzgi suratlarda ranglar tabiiy, tafsilotlar yuqori darajada saqlanadi. Portret rejimida teri ranglari aniq va real chiqadi. Video yozuvda 4K/60 va 4K/120fps rejimlari barqarorlik va tiniqlik bilan ajralib turadi. Past yorug‘likda kamera avtomatik optimizatsiya orqali shovqinni kamaytirib, silliq va sifatli tasvir beradi.
Apple iPhone 16 Pro Max (2024)
2024-yilda taqdim etilgan iPhone 16 Pro Max kamera imkoniyatlarini yanada kengaytirdi. Qurilma 48 MP asosiy va ultra keng kamera hamda 5x optik zumli telefoto modulga ega. DXOMARK reytingida u 157 ball bilan yuqori o‘rinlardan birini egalladi.
Apple bu modelda rang aniqligi va dinamik oralikni yanada yaxshiladi. Past yorug‘likda ham video sifati deyarli shovqinsiz saqlanadi. Tungi videoyozuv bo‘yicha iPhone 16 Pro Max bozordagi eng kuchli qurilmalardan biri sifatida e’tirof etildi.
Samsung Galaxy S23 Ultra (2023)
Samsung Galaxy S23 Ultra 200 MP asosiy kamerasi va 3x hamda 10x optik zumli ikki telefoto linzasi bilan ajralib turadi. DXOMARK testlarida u 140 ball to‘plab, universal va kuchli kamera tizimiga ega smartfon sifatida baholandi.
Yorug‘ sharoitda suratlar juda batafsil va rangli chiqadi. 10x optik zum uzoq masofadagi ob’ektlarni aniq qayd etadi. Video yozuvda esa stabilizatsiya va autofokus barqaror ishlaydi.
Samsung Galaxy S24 Ultra (2024)
Galaxy S24 Ultra’da Samsung telefoto tizimini qayta ko‘rib chiqdi. Endi model 3x va 5x optik zumli linzalarga ega. DXOMARK reytingida qurilma 144 ball bilan S23 Ultra’dan biroz ustun chiqdi.
Portret va HDR suratlar jonli ranglari bilan ajralib turadi. Ultra keng kamera ham yuqori sifatni saqlaydi. Biroq past yorug‘likda video yozishda iPhone modellariga nisbatan biroz orqada qolishi qayd etilgan.
Google Pixel 8 Pro (2023)
Google Pixel 8 Pro 50 MP asosiy kamera va kuchli sun’iy intellekt algoritmlari bilan ajralib turadi. DXOMARK testlarida u 152 ball to‘plab, kunduzgi suratga olish bo‘yicha eng yaxshi modellardan biri deb topildi.
Suratlar rang-barang va ekspozitsiyasi aniq chiqadi. HDR video rejimi va mukammal stabilizatsiya Pixel’ning asosiy ustunliklaridan hisoblanadi. “Magic Eraser” va “Face Unblur” kabi AI funksiyalari kamera tajribasini yanada boyitadi.
Google Pixel 9 Pro XL (2024)
Pixel 9 Pro XL sun’iy intellektga asoslangan video imkoniyatlari bilan ajralib turadi. DXOMARK reytingida u 158 ball to‘plab, eng kuchli kamerali smartfonlar qatoriga kirdi.
“Video Boost” va “Super Res Zoom Video” funksiyalari tufayli past yorug‘likda ham barqaror va tiniq video olish mumkin. 20x raqamli zum bilan ham sifatning saqlanishi ushbu modelning muhim ustunligi hisoblanadi.
O‘rta sinf yetakchilari: Pixel 7a va Pixel 8a
Google Pixel 7a va Pixel 8a o‘rta narx segmentida kamera sifati bilan ajralib turadi. Pixel 7a DXOMARK’da 133 ball, Pixel 8a esa 136 ball to‘pladi. Kunduzgi va tungi suratlar sifati ko‘plab flagmanlarga yaqin natija ko‘rsatadi.
Video yozuvda stabilizatsiya samarali, ranglar tabiiy. SI funksiyalar esa ushbu modellarning asosiy ustunligidir.
Huawei flagmanlari: P60 Pro, Pura 70 Ultra va Pura 80 Ultra
Huawei so‘nggi yillarda kamera texnologiyalarida yetakchilikni qo‘lga oldi. P60 Pro 156 ball bilan kuchli natija ko‘rsatgan bo‘lsa, Pura 70 Ultra 163 ball bilan DXOMARK reytingida yetakchiga aylandi.
2025-yilda taqdim etilgan Huawei Pura 80 Ultra esa 175 ball bilan rekord natijani qayd etdi. Keng dinamik oralik, yuqori darajadagi zum va mukammal video stabilizatsiyasi ushbu modelni mobil fotografiyada yangi standartga aylantirdi.
Qaynoq24.uz nashri 2025-yilning eng yaxshi smartfonlari e’lon qilingani haqida yozgan edi.
