AQShning yangi tayinlangan Grenlandiya bo‘yicha maxsus vakili, Luiziana gubernatori Jeff Lendri Donald Tramp administratsiyasi orolda hududiy da’volar yoki kuch bilan egallash rejalariga ega emasligini ma’lum qildi. Bu haqda Associated Press xabar bermoqda.
Lendri vazifaga kirishganidan keyingi ilk izohlarida AQSh hech kimni bosib olish yoki biror davlatni tortib olish niyatida emasligini ta’kidladi. Uning aytishicha, asosiy maqsad — Grenlandiya aholisi bilan muloqot qilish, ularning ehtiyojlari va imkoniyatlarini aniqlash hamda ular yetarlicha himoya va rivojlanish imkoniga ega bo‘lishiga ko‘maklashishdir.
Tramp so‘nggi yillarda bir necha bor Grenlandiyaga qiziqish bildirgan va shu mavzu yana kun tartibiga qaytgach, maxsus vakil tayinladi. Bu qaror Daniya tashqi ishlar vaziri Lars Lekke Rasmussenning keskin reaksiyasiga sabab bo‘ldi. U Lendri bayonotini keskin tanqid qilib, Vashingtonni vaziyatni keskinlashtirishda aybladi va Grenlandiya aholisining fikri inobatga olinishi lozimligini eslatdi.
Vaziyat yuzasidan muzokaralar davom etmoqda, biroq rasmiylar hozircha harbiy yoki hududiy ekspansiya haqida gap ketmayotganini qayd etmoqda.
Qaynoq24.uz AQShdagi qariyalar uyida kuchli portlash sodir bo‘lgani haqida yozgan edi.
