Samsung Galaxy S26 Ultra 60 vattli tezkor quvvatlashga ega bo‘ladi. Bu haqda 3C sertifikatlash bazasida paydo bo‘lgan ma’lumotlar tasdiqladi.
Ma’lumotlarga ko‘ra, SM-S9480 modeli 45 vattlik cheklovdan voz kechib, 60 vattli tezkor quvvatlashga o‘tmoqda. Bu Samsung flagmanlari uchun so‘nggi yillardagi eng katta o‘zgarishlardan biri hisoblanadi.
Insayder Ice Universe’ning aytishicha, yangi 60 vattli adapter bilan Galaxy S26 Ultra 30 daqiqada 75 foizgacha quvvatlanadi. To‘liq 0 dan 100 foizgacha quvvatlash esa taxminan 50–55 daqiqani tashkil etadi. Bu avvalgi modellardagi bir soatdan oshiq vaqtni sezilarli qisqartiradi.
Smartfon batareya sig‘imi bo‘yicha o‘zgarishsiz qoladi. Samsung 5 000 mA/soatlik akkumulyatorni saqlab qolishni ma’qul ko‘rgan. Kompaniya yupqaligi va issiqlik xavfsizligini ustuvor deb bilmoqda.
Galaxy S26 Ultra yana bir muhim yangilikka ega bo‘ladi. Qurilmada Qi2 magnitli simsiz quvvatlash texnologiyasi ichki qo‘llab-quvvatlanadi. Bu 25 vattgacha bo‘lgan magnitli simsiz quvvatlash imkonini beradi. Avvalgi 15 vattlik simsiz quvvatlash bilan solishtirganda bu sezilarli sakrash hisoblanadi.
Biroq tezkor quvvatlash faqat Ultra modeliga xos bo‘ladi. Galaxy S26 modeli 25 vattda, S26 Plus esa 45 vattda qoladi. Samsung yana yuqori texnologiyalarni faqat eng qimmat versiyada taqdim etmoqda.
Galaxy S26 Ultra’ning rasmiy taqdimoti 2026-yil fevral oxirida Galaxy Unpacked tadbirida o‘tkazilishi kutilmoqda.
Qaynoq24.uz 175 dollarlik Samsung Galaxy A07 taqdim etilgani haqida yozgan edi.
