AQShda keng hududlarni qamrab olgan kuchli qishki bo‘ron oqibatida yuz minglab odam kundalik hayotda jiddiy muammolarga duch kelmoqda. Mamlakat bo‘ylab elektr ta’minotida uzilishlar, parvozlarning bekor qilinishi va yo‘llarning yopilishi qayd etildi.
AQSh Milliy ob-havo xizmati ma’lumotlariga ko‘ra, Texasdan tortib Yangi Angliyagacha cho‘zilgan hududlarda qor, muz va muzlaydigan yomg‘ir hayot uchun xavfli sharoitlarni yuzaga keltirmoqda. Sinoptiklar bu holat bir necha kun davom etishi mumkinligini bildirmoqda.
Yakshanba kuni tushdan keyin holatiga ko‘ra, bir milliondan ortiq uy xo‘jaligi elektrsiz qolgan. Shu bilan birga, FlightAware ma’lumotlariga ko‘ra, 10 mingdan ziyod aviareys bekor qilingan. Mutaxassislar taxminicha, 180 millionga yaqin amerikalik, ya’ni aholining yarmidan ko‘pi ushbu bo‘ron ta’sirida qolmoqda.
Bo‘ron oqibatida qurbonlar ham qayd etildi. Luiziana shtatida kamida ikki kishi gipotermiya sabab vafot etgani ma’lum qilindi. Texasda ham sovuq bilan bog‘liq yana bir o‘lim holati tasdiqlandi. Ayrim shtatlarda muzning ko‘pligi daraxtlarning qulashiga, elektr simlarining uzilishiga va yo‘llarning o‘ta xavfli holatga kelishiga olib kelmoqda.
Virjiniya shtatida bo‘ron kirib kelganidan so‘ng 200 dan ortiq yo‘l-transport hodisasi qayd etilgan. Nyu-York shahri meri sovuq har yili insonlar hayotiga zomin bo‘layotganini eslatib, so‘nggi kunlardagi o‘lim holatlarining sabablarini aniqlash ishlari olib borilayotganini ma’lum qildi.
Rasmiylar aholiga zarurat bo‘lmasa uyda qolishni, uzoq safarlardan va avtomobil harakatidan voz kechishni tavsiya qilmoqda. Nyu-York shtati gubernatori hozirgi bo‘ronni so‘nggi yillardagi eng sovuq va eng xavfli ob-havo hodisalaridan biri sifatida baholadi.
Meteorologlarning tushuntirishicha, mazkur bo‘ronning asosiy sababi qutb girdobi hisoblanadi. Arktika ustida shakllanadigan kuchli shamollar zaiflashganda, sovuq havo janubga siljiydi va iliq havo bilan to‘qnashib, kuchli bo‘ronlarni yuzaga keltiradi. Bu safar ham aynan shu jarayon AQSh hududida keskin sovuqlar va muzli yog‘ingarchilikka sabab bo‘lgan.
Qaynoq24.uz Indoneziyadagi kuchli suv toshqinlari oqibatida kamida 16 kishi halok bo‘lgani haqida yozgan edi.
