Xitoyning Geely kompaniyasi yangi flagman yo‘ltanlamas avtomobilining prototipini namoyish qildi. Galaxy Cruiser deb atalgan model Land Rover Defender va Toyota Land Cruiser kabi mashhur modellarga raqobatchi bo‘lishi kutilmoqda.
Hozircha avtomobil konsept nomi bilan tanilgan. Uning dizaynida burchakli kuzov, qisqa osmalar, keng g‘ildirak arkasi va katta old bamper kabi elementlar mavjud. Tashqi ko‘rinishi Land Rover Defender uslubini eslatadi. Shu bilan birga, model Toyota Land Cruiser Prado bilan ham raqobatlashishi kutilmoqda.
Geely yangi avtomobilni qattiq sharoitlarda sinovdan o‘tkazmoqda. Prototip Shvetsiyaning Arjeplog hududida sovuq iqlim sharoitida test qilinmoqda.
Texnik jihatdan model kuchli gibrid tizim bilan jihozlanishi mumkin. Dastlabki ma’lumotlarga ko‘ra, avtomobil SEA-R platformasida ishlab chiqiladi.
Kutilishicha, tizim uchta elektromotor va turbinali ichki yonuv dvigatelidan iborat bo‘ladi. Bu esa avtomobilga asfalt yo‘llarda ham, og‘ir yo‘lsizlik sharoitida ham yaxshi harakatlanish imkonini beradi.
Ba’zi ma’lumotlarga ko‘ra, seriyali model suv to‘siqlarini suzib o‘tish imkoniyatiga ega bo‘lishi mumkin. Bunday rejimda avtomobil soatiga 8 km tezlikda harakatlana oladi. Yo‘ltanlamas sun’iy intellekt asosidagi to‘liq uzatma tizimi bilan ham jihozlanishi kutilmoqda. 70 kVt/soat batareya bilan elektr rejimida 350 km dan ortiq masofa bosib o‘tishi mumkin.
Yangi Geely yo‘ltanlamasining Xitoydagi savdosi 2026-yil oxirida boshlanishi rejalashtirilgan. Keyinchalik model Yevropa bozorida ham paydo bo‘lishi kutilmoqda.
