Google Android tizimida foydalanuvchi maxfiyligini kuchaytirishga qaratilgan yana bir muhim yangilikni taqdim etdi. Bu haqda ITHome nashri ma’lum qildi.
Android 17 versiyasida yangi Contact Picker API joriy etilib, ilovalarning kontaktlar ro‘yxatiga kirish tartibi sezilarli darajada o‘zgartirilmoqda. Endi ilovalar foydalanuvchi ruxsat bergan taqdirda ham butun telefon kitobini ko‘ra olmaydi, balki faqat foydalanuvchi tanlab bergan kontaktlargina ochiladi.
Google’ning Android Developer Blog’ida ta’kidlanishicha, hozirgi Android tizimida ilovalar foto galereya kabi sezgir ma’lumotlarga to‘liq kira olmaydi, biroq kontaktlarga ruxsat berilganda butun telefon kitobi ochilib ketardi. Bu esa maxfiylik bilan bog‘liq xavotirlarni kuchaytirayotgan edi. Android 17 dagi yangi yondashuv aynan shu muammoni hal qilishga qaratilgan.
Yangi Contact Picker API ishlash prinsipi jihatidan foto tanlash oynasiga o‘xshaydi, biroq u an’anaviy READ_CONTACTS ruxsatini to‘liq bermaydi. Buning o‘rniga Intent.ACTION_PICK_CONTACTS mexanizmi orqali tizim foydalanuvchiga aniq qaysi kontaktlarni ulashishni o‘zi tanlash imkonini beradi. Shu tariqa ilova butun kontaktlar ro‘yxatini emas, faqat kerakli kontaktlarni ko‘ra oladi.
Bundan tashqari, ilovalar endi faqat kerakli ma’lumot maydonlarini so‘rashi mumkin. Masalan, ilovaga faqat telefon raqami kerak bo‘lsa, email, manzil yoki boshqa ma’lumotlarga kirish talab qilinmaydi. Bu esa foydalanuvchi ma’lumotlarini ortiqcha ulashishni oldini oladi va xavfsizlikni yanada oshiradi.
Yangi tizim foydalanuvchi tajribasini ham yaxshilaydi. Android 17 da bir vaqtning o‘zida bir nechta kontaktni tanlash imkoniyati mavjud bo‘ladi. Shu bilan birga, ishlab chiquvchilar foydalanuvchi tanlashi mumkin bo‘lgan kontaktlar soniga cheklov qo‘yishi mumkin. Muhimi, berilgan ruxsat vaqtinchalik bo‘ladi va ilova doimiy kirish huquqiga ega bo‘lmaydi.
Yana bir muhim yangilik shundaki, Contact Picker tizimi qurilmadagi boshqa profil, ilova klonlari yoki maxfiy hududlardagi kontaktlarga ham xavfsiz tarzda kirish imkonini beradi. Bu Android’ning ko‘p foydalanuvchili muhitida ishlovchilar uchun qulaylik yaratadi.
Qaynoq24.uz Android’da yashirin xavfsizlik funksiyasi aniqlangani haqida yozgan edi.
