Huawei yangi Pura 90 Pro modelida kamera texnologiyasini sezilarli yangilashi mumkin. Bu haqda so‘nggi sizib chiqqan ma’lumotlarda aytilmoqda.
Xabarlarga ko‘ra, kompaniya telefoto kamera uchun LOFIC texnologiyasini sinovdan o‘tkazmoqda. Bu yechim ayniqsa uzoq masofadan suratga olish sifatini oshirishga qaratilgan. LOFIC texnologiyasi yorug‘likni boshqarishni yaxshilaydi. U ortiqcha yorug‘likni vaqtincha saqlab, keyin nazorat bilan ishlatadi. Shu sababli suratning yorqin qismlarida detallar yo‘qolib ketmaydi.
Qorong‘i sharoitda esa sensor juda kam yorug‘likni ham samarali ushlab qoladi. Natijada shovqinsiz va aniqroq suratlar olinadi. Bu ayniqsa zoom rejimida muhim hisoblanadi.
Agar bu texnologiya joriy qilinsa, uzoq masofadan olingan suratlar sifat jihatdan ancha yaxshilanishi mumkin. Ma’lumotlarga ko‘ra, Pura 90 seriyasida bir nechta model bo‘ladi. Oddiy versiya 6,58 dyuymli ekran bilan keladi. Yuqori modellarda esa 6,87 dyuymli katta displey bo‘lishi kutilmoqda.
Shuningdek, bazaviy model Kirin 9020 chipiga ega bo‘lishi mumkin. Pro versiya esa Kirin 9030 bilan jihozlanadi. Ultra modelda yanada kuchliroq chip qo‘llanilishi kutilmoqda. Huawei odatdagidek yangi flagmanini yilning birinchi yarmida taqdim etishi mumkin. Hozircha rasmiy ma’lumotlar e’lon qilinmagan.
Qaynoq24.uz Huawei Pura 90 Ultra smartfoni qanday kamera bilan chiqishi haqida yozgan edi.
