Andijon viloyatida qalbaki dori tayyorlagan yashirin laboratoriyalar fosh etildi. Bu haqda DXX xabar bermoqda.
Ma’lum bo‘lishicha, Andijon shahri va Asaka tumanida yashovchi 3 nafar fuqaro o‘z uyida sifati kafolatlanmagan dori vositalarini tayyorlash bilan shug‘ullangan. Ushbu tadbir DXX Chegara qo‘shinlari va bojxona organlari hamkorligida o‘tkazilgan.
Tekshiruv davomida manzillarda maxsus jihozlangan yashirin laboratoriyalar borligi aniqlangan. U yerdan umumiy qiymati 1,1 mlrd so‘mlik 122 turdagi 60 mingdan ortiq dori vositalari dalil sifatida olingan.
Dastlabki ma’lumotlarga ko‘ra, ushbu mahsulotlar Qirg‘izistondan noqonuniy olib kirilgan. Dorilarning bir qismi yarim tayyor, yana bir qismi esa qayta ishlangan holatda bo‘lgan.
Mutaxassislar bu turdagi dori vositalari inson salomatligi uchun jiddiy xavf tug‘dirishini ta’kidladi. Hozirda mazkur holat yuzasidan surishtiruv ishlari olib borilmoqda.
Qaynoq24.uz Toshkentda noqonuniy tamaki savdosi fosh etilgani haqida yozgan edi.
