Forbes nashrining yozishicha, AQShda bayram mavsumining eng gavjum kuni hisoblangan juma kuni yomon ob-havo sabab minglab aviareyslar kechiktirildi yoki bekor qilindi.
FlightAware ma’lumotlariga ko‘ra, 19-dekabr kuni soat 17:20 holatiga AQSh bo‘ylab 7 ming 654 ta reys kechiktirilgan, qariyb 1 ming 200 tasi bekor qilingan.
Eng ko‘p kechikishlar Denver, Chikago O‘Hare, Nyu-York LaGuardia, Dallas, Atlanta hamda Nyu-Yorkdagi John F. Kennedy aeroportlarida qayd etilgan. Ayrim aeroportlarda 200 tadan ortiq parvoz belgilangan vaqtda amalga oshmagan.
Federal Aviation Administration juma kuni yetti ta yirik aeroportda yer usti kechikishlari yoki parvozlarni vaqtincha to‘xtatish ehtimoli borligini ma’lum qildi.
Yirik aviakompaniyalar yo‘lovchilar uchun yengilliklar joriy etdi. American Airlines Sharqiy sohilning sakkizta aeroporti orqali uchayotgan yo‘lovchilarga jarimasiz qayta bron qilishga ruxsat berdi. Southwest Airlines Shimoli-sharq va Mid-Atlantika hududidagi olti aeroport bo‘yicha shunga o‘xshash qaror qabul qildi.
Delta Air Lines Boston va Nyu-York atrofidagi besh aeroport bo‘yicha bepul qayta rejalashtirish imkonini taqdim etdi. United Airlines ham Boston, Nyu-York, Newark va Filadelfiya aeroportlarini qamrab olgan ogohlantirish e’lon qildi. JetBlue Airways esa juma va shanba kunlari to‘rtta shimoli-sharqiy aeroportda parvozi bor yo‘lovchilarga jarimasiz o‘zgartirish kiritish huquqini berdi.
AQSh Milliy ob-havo xizmati prognoziga ko‘ra, Buyuk Ko‘llar hududidan Sharqiy sohilgacha bo‘lgan keng hududda kuchli yomg‘ir va shamol kuzatiladi. Michigan va Ogayo shtatlarining ayrim qismlarida esa qor yog‘ishi kutilmoqda.
Qaynoq24.uz AQShda xususiy samolyot halokatga uchragani haqida yozgan edi.
