AQSh bo‘ylab 18-oktabr kuni “Qirollar yo‘q” nomli ommaviy namoyishlar bo‘lib o‘tdi. Ular prezident Donald Trampning siyosati va uning avtoritar uslubdagi boshqaruviga qarshi yo‘naltirilgan edi.
Mamlakatning 2600 dan ortiq shahar va qishloqlarida o‘tkazilgan mitinglarda millionlab odamlar qatnashdi. Ishtirokchilar orasida keksalar, yoshlar, ota-onalar va hatto bolalar ham bor edi. Namoyishlar asosan tinch o‘tdi, jiddiy tartibsizliklar qayd etilmagan.
Nyu-Yorkdagi Tayms maydonida 100 mingdan ortiq odam yig‘ildi. Shunga o‘xshash yurishlar Boston, Chikago, Atlanta, Denver, Sietl va Los-Anjelesda ham o‘tkazildi. Politsiya xabariga ko‘ra, San-Diyegoda 25 ming kishi tinch namoyishda qatnashgan.
Namoyishchilar Trampning siyosatini, xususan, immigratsiya siyosatini harbiylashtirish, muxoliflarni ta’qib qilish va matbuotga bosim o‘tkazish kabi harakatlarini tanqid qildi. Ko‘pchilik uni demokratiya tamoyillarini buzayotganlikda ayblamoqda.
Donald Tramp haqida nimalar ma’lum
Donald Tramp — 1946-yil 14-iyunda Nyu-Yorkda tug‘ilgan amerikalik siyosatchi, tadbirkor va teleboshlovchi. U 2017-yilda AQShning 45-prezidenti sifatida lavozimga kirishgan va 2021-yilgacha faoliyat yuritgan. 2025-yilda esa qayta saylanib, mamlakatni ikkinchi bor boshqara boshladi. Tramp ilgari “Trump Organization” kompaniyalar guruhiga rahbarlik qilgan va ko‘plab mehmonxonalar, hashamatli uylari hamda golf maydonlariga egalik qilgan. U o‘z faoliyatini ko‘chmas mulk biznesida boshlagan, keyinchalik televideniyeda “The Apprentice” shousi orqali mashhurlikka erishgan.
Tramp siyosatga 2015-yilda qadam qo‘yib, “Amerikani yana buyuk qilamiz” shiori ostida prezidentlik kampaniyasini olib borgan. U respublikachi sifatida saylovda g‘alaba qozonib, ko‘plab siyosiy bahs-munozaralarga sabab bo‘lgan qarorlarni qabul qilgan. Uning siyosati immigratsiya nazoratini kuchaytirish, savdo tariflarini oshirish va milliy sanoatni himoya qilishga qaratilgan edi.
Tramp ijtimoiy tarmoqlarda faol bo‘lib, Twitter orqali to‘g‘ridan-to‘g‘ri xalq bilan muloqot qilgan birinchi AQSh prezidenti sifatida tanilgan. U haqidagi qarashlar jamiyatda keskin bo‘linish keltirib chiqargan bo‘lsa-da, tarafdorlari uni iqtisodiy o‘sish, ish o‘rinlarini yaratish va mustaqil siyosat yuritgan lider sifatida e’tirof etadi.
