Amsterdamda dinozavr terisidan tayyorlangan sumka auksionga qo‘yiladi. Bu haqda Reuters agentligi ma’lum qildi.
Sumka Amsterdamdagi ArtZoo Museum muzeyida ko‘rgazmaga qo‘yildi. U 11-maygacha namoyish etiladi. Shundan so‘ng auksionga chiqariladi. Boshlang‘ich narxi $500 mingdan yuqori bo‘lishi aytilmoqda.
Loyiha mualliflari materialni laboratoriyada yaratgan. Olimlar dinozavr suyaklaridan topilgan oqsil parchalarini ajratib olgan. Keyin ularni boshqa hayvon hujayralariga joylashtirib, kollagen ishlab chiqargan. Ushbu kollagendan sun’iy charm tayyorlangan.
Loyiha ustida bir nechta kompaniyalar ishlagan. Ular orasida The Organoid Company va Lab-Grown Leather Ltd. ham bor. Mutaxassislar bu texnologiya ekologik toza charm ishlab chiqarish imkonini berishini ta’kidladi.
Biroq barcha olimlar bu g‘oyani qo‘llab-quvvatlamayapti. Ba’zi ekspertlar “T-reks charm” atamasiga shubha bilan qaramoqda. Ularning aytishicha, dinozavr kollageni faqat juda kichik parchalar holida saqlanadi. Shu sababli to‘liq dinozavr terisini tiklash imkonsiz.
Qaynoq24.uz Filippinda dengiz bodringi terayotgan erkak timsoh hujumidan halok bo‘lgani haqida yozgan edi.
