O‘zbekistonda dori vositalarini davlat ro‘yxatidan o‘tkazish tartibi belgilandi. Bu haqda Adliya vazirligi xabar bermoqda.
Yangi tartibga ko‘ra, dorilar umumiy tartibda yoki tan olish yo‘li bilan ro‘yxatdan o‘tkaziladi. Bu jarayon dorilarning xavfsizligi va sifati bo‘yicha yagona talablarni joriy qiladi.
Nizomga muvofiq, dorilar bilan birga O‘zbekistonda avval ro‘yxatdan o‘tgan vositalarning yangi kombinatsiyalari ham nazoratga olinadi. Bundan tashqari, ilgari ro‘yxatdan o‘tgan bo‘lsa-da, boshqa shaklda, boshqa dozada yoki boshqa ishlab chiqaruvchi tomonidan tayyorlangan dori vositalari ham qaytadan baholanadi. Shuningdek, tarkibi yoki biologik xususiyatlari o‘zgargan, hujayra texnologiyasi asosida ishlab chiqarilgan biotexnologik dorilar ham ro‘yxatdan o‘tkaziladi.
Ro‘yxatdan o‘tkazish yakuniga ko‘ra amal qilish muddati besh yil bo‘lgan guvohnoma beriladi. Bu guvohnoma dori vositasining mamlakat hududida qo‘llanishiga ruxsat berilganini tasdiqlaydi.
Tibbiyot amaliyotida qo‘llanishi mumkin bo‘lgan dorilar va tibbiy jihozlar davlat reestri “Farmatsevtika mahsulotlari xavfsizligi markazi” tomonidan yuritiladi. Reestr sog‘liqni saqlash vazirligining va markazning rasmiy saytlarida e’lon qilinadi.
Avvalroq Qaynoq24.uz nashri Namanganda 1,4 mlrd so‘mlik qalbaki dori vositalari savdosining oldi olingani haqida yozgan edi.
