Ikki hududda energiya resurslaridan noqonuniy foydalanish holatlari fosh etildi. Departament xabariga ko‘ra, 588 mln so‘mlik energiya “o‘marilgan”.
Bosh prokuratura huzuridagi Departamentning Quvasoy shahri bo‘limi tomonidan o‘tkazilgan tergovga qadar tekshiruv jarayonida “H.G.” MCHJ mas’ul shaxslari “Ziynat” MFY hududidagi go‘shtni qayta ishlash tsexida tijorat maqsadida umumiy foydalanishdagi elektr tarmog‘iga o‘zboshimchalik bilan ulanib, 353,9 million so‘mlik elektr energiyasidan noqonuniy foydalanganliklari aniqlangan.
Shuningdek, Departamentning Baliqchi tumani bo‘limi tomonidan o‘tkazilgan nazorat tadbirida “B.S.” MCHJ rahbari B.B. “Sheralichek” MFY hududidagi ishlab chiqarish tsexida tijorat maqsadida umumiy elektr tarmog‘iga o‘zboshimchalik bilan ulanib, 235,4 million so‘mlik elektr energiyasidan noqonuniy foydalanib kelganligi ma’lum bo‘lgan.
Mazkur holatlar yuzasidan Jinoyat kodeksining 169-moddasi (o‘g‘irlik) bilan jinoyat ishlari qo‘zg‘atilib, tergov harakatlari olib borilmoqda.
25 yildan ortiq qidiruvda bo‘lgan xalqaro terroristik tashkilot a’zosi O‘zbekistonga olib kelingani haqida xabar berilgan edi.
