Farg‘ona va Toshkent hududlarida noqonuniy tamaki mahsulotlari savdosiga oid ikki holat fosh etildi. Bu haqda Bosh prokuratura huzuridagi Departament ma’lum qildi.
Departamentning Quvasoy shahri bo‘limi va Bojxona xizmati xodimlari o‘tkazgan tezkor tadbirda, M.V. ismli shaxs “Haval” rusumli avtomobilida xorijda ishlab chiqarilgan, umumiy qiymati 64,7 million so‘m bo‘lgan 2 000 quti aksiz markasiz tamaki mahsulotini Farg‘ona shahrida sotish maqsadida olib ketayotganda qo‘lga olingan. Mahsulotlar daliliy ashyolar sifatida rasmiylashtirilgan.
Shuningdek, Departamentning Sergeli tumani bo‘limi xodimlari tomonidan o‘tkazilgan tadbirda “S.D.” MChJ savdo do‘koni sotuvchisi I.E. elektron tamaki mahsulotlarini noqonuniy realizatsiya qilib kelgani aniqlangan. Do‘kondan xorijda ishlab chiqarilgan 30 turdagi 259 dona elektron tamaki mahsulotlari daliliy ashyolar sifatida olingan.
Har ikki holat bo‘yicha Jinoyat kodeksining 25 va 186-1-moddalari (etil spirti, alkogol va tamaki mahsulotlarini qonunga xilof ravishda muomalaga kiritish yoki ishlab chiqarish) bilan jinoyat ishlari qo‘zg‘atildi. Hozirda tergov harakatlari davom etmoqda.
Qaynoq24.uz Nurofshonda hokim yordamchisi qamoqqa olingani haqida yozgan edi.
