Honor kompaniyasi yuqori sig‘imli akkumulyatorlarga ega smartfonlar qatorini keskin kengaytirishni rejalashtirmoqda. Gap faqat flagman modellar haqida emas — kompaniya o‘rta narx segmentida ham katta batareyali bir nechta qurilmalarni ishlab chiqmoqda. Ma’lumotlarga ko‘ra, Honor kamida uchta o‘rta toifadagi smartfonni 10 000 mA/soatga yaqin akkumulyator bilan jihozlashni rejalashtirgan.
Honor’ning seriyali ishlab chiqarishga tayyor bo‘lgan batareyalari maksimal 12 000 mA/soat sig‘imga ega. Muhimi, bu ko‘rsatkichlar tajriba namunalariga emas, balki ommaviy ishlab chiqarish bosqichiga yetgan real akkumulyatorlarga tegishli.
Digital Chat Station hozirgi natijalar yakuniy emasligini ham qayd etgan. Honor avtonomlikni yanada oshirish ustida ish olib bormoqda va bu kelajakda yanada katta sig‘imli batareyalarga ega smartfonlar paydo bo‘lishiga olib kelishi mumkin.
Avvalroq insayder Honor deyarli 12 000 mA/soatli akkumulyatorga ega smartfon tayyorlab bo‘lganini, hozirda esa 15 000 mA/soatli batareyali model ustida ishlayotganini ma’lum qilgan edi. Shuningdek, boshqa ishlab chiqaruvchilar ham 12 000 mA/soatli batareyaga ega seriyali smartfonlarni sinovdan o‘tkazayotgani, 15 000 mA/soatli akkumulyatorlarga ega prototiplar ustida tajribalar davom etayotgani aytilmoqda.
Agar 10 000 mA/soat sig‘imli batareyalar yangi sanoat standartiga aylansa va 15 000 mA/soatli yechimlar ommaviy ishlab chiqarish darajasiga yetkazilsa, foydalanuvchilar uchun tashqi quvvatlagichlarga bo‘lgan ehtiyoj sezilarli darajada kamayishi mumkin. Xitoylik smartfon ishlab chiqaruvchilar aynan shu yo‘nalishda faol ish olib bormoqda.
Qaynoq24.uz eng yaxshi Honor smartfonlari haqida yozgan edi.
