Honor kompaniyasi ixcham va yupqa korpusga ega yangi smartfon ustida ishlamoqda. Qurilmaning rasmiy nomi hozircha oshkor etilmagan bo‘lsa-da, u Honor Magic 8 Slim yoki Honor Magic 8 Mini nomlari bilan tilga olinmoqda. Mashhur insayder Digital Chat Station Weibo‘dagi sahifasida smartfonning asosiy texnik xususiyatlari va rang variantlarini ma’lum qildi.
Manbaga ko‘ra, kod nomi Lindy bo‘lgan Honor Magic 8 Slim / Mini 6,3 dyuymli tekis displey bilan jihozlanadi. Avvalgi sizib chiqishlarda ushbu ekran OLED LTPO panel asosida bo‘lib, 1.5K aniqlikni taqdim etishi aytilgan.
Smartfonning ishlashiga MediaTek Dimensity 9500 protsessori javob berishi kutilmoqda. Hisob-kitoblarga ko‘ra, Honor ushbu modelni 2026-yil boshida taqdim etilishi kutilayotgan Honor Power 2 smartfonidan keyin, ya’ni ancha erta namoyish qilishi mumkin. MediaTek esa Dimensity 9500’ning kuchaytirilgan Plus versiyasini 2026-yil bahorida chiqarishni rejalashtirmoqda.
Insayderning qayd etishicha, Honor Magic 8 Slim / Mini yaxshi kamera imkoniyatlari, metall rom, hamda ekran ostiga joylashtirilgan ultratovushli barmoq izi skaneri bilan ta’minlanadi. Qurilma Feather White, Shadow Black, Light Orange va Fairy Purple rang variantlarida taqdim etiladi. Shuningdek, smartfon allaqachon tayyor bo‘lib, uni ishlab chiqish va bozorga chiqarish jarayoni tezlashtirilgan.
Avvalgi ma’lumotlarga ko‘ra, ushbu modelning qalinligi atigi 5–6 millimetr atrofida bo‘lishiga qaramay, u 5 500 mA/soat sig‘imli batareya bilan jihozlanadi. Tezkor quvvatlash bo‘yicha aniq ma’lumotlar yo‘q, biroq simsiz quvvatlash qo‘llab-quvvatlanishi aytilmoqda.
Kamera borasida dastlab 200 megapikselli asosiy sensor tilga olingan bo‘lsa, keyingi sizib chiqishlarda u 50 megapikselli kamera bilan almashtirilishi mumkinligi aytilmoqda. Kamera tizimida, shuningdek, periskop telefoto modul bo‘lishi kutilmoqda.
Bundan tashqari, avvalroq Honor kompaniyasi Honor Magic 8 RSR (yoki Magic 8 Ultra) nomli yana bir flagman ustida ishlayotgani haqida xabarlar paydo bo‘lgan. Ushbu model Snapdragon 8 Elite Gen 5 protsessori bilan jihozlanishi va Magic 8 Slim / Mini bilan bir vaqtda taqdim etilishi mumkin.
Qaynoq24.uz eng yaxshi Honor smartfonlari haqida yozgan edi.
