Honor kompaniyasi yangi Magic 9 flagman smartfoni uchun 9000 mA/soat sig‘imli batareyani sinovdan o‘tkazmoqda. Bu haqda Gizchina nashri xabar berdi.
Agar ushbu batareya ishlab chiqarish bosqichiga yetib borsa, u seriya tarixidagi eng katta sig‘im bo‘ladi. Hozirgi flagman modellarda bunday katta batareya deyarli uchramaydi. Ma’lum qilinishicha, bu yechim kompaniyaning ichki “komponentlarni joylashtirish” strategiyasi doirasida sinovdan o‘tkazilmoqda. Ya’ni, qurilmaga maksimal imkoniyatlarni joylash orqali yangi darajaga chiqish maqsad qilingan.
Shu bilan birga, barcha sinovdan o‘tayotgan texnologiyalar yakuniy modelga kiritilmasligi mumkin. Odatda ishlab chiqaruvchilar ayrim funksiyalarni faqat yuqori versiyalar uchun qoldiradi. Mutaxassislar 9000 mA/soat batareya flagman segmenti uchun noodatiy ekanini ta’kidlashmoqda. Chunki bunday sig‘im qurilma qalinligi va og‘irligiga ta’sir qilishi mumkin.
Bundan tashqari, zaryadlash tezligi ham muhim omil bo‘ladi. Masalan, 66 Vt va 100 Vt dan yuqori tezkor zaryadlash o‘rtasida katta farq bor. Honor Magic 9 seriyasida ovoz tizimi va vibratsiya motorini ham yaxshilash rejalashtirilmoqda. Bu esa foydalanuvchi tajribasini yanada oshirishi kutilmoqda.
Hozircha modelning aniq texnik xususiyatlari, narxi va taqdimot sanasi rasman e’lon qilinmagan. Smartfon hali sinov bosqichida qolmoqda.
Qaynoq24.uz Aprel oyi texnologiya bozori uchun eng sermahsul davrlardan biriga aylanmoqda. Bir oy ichida OPPO, Huawei, Honor va Redmi yangi qurilmalarni taqdim etishga tayyorlanayotgani haqida yozgan edi.
