Honor kompaniyasi Xitoyda yangi buklanuvchi smartfoni — Honor Magic V6 modelini taqdim etdi. Bu haqda Gizmochina nashri xabar bermoqda. Qurilma Snapdragon 8 Elite Gen 5 protsessori, katta batareya va yupqa korpusi bilan ajralib turadi.
Smartfon narxi 8,9 ming yuan, ya’ni taxminan $1,25 mingdan boshlanadi. Bu 12 GB tezkor xotira va 256 GB doimiy xotirali versiya uchun belgilangan.
Narx
12 GB + 512 GB varianti 9 999 yuan ($1,39 ming) turadi. 16 GB + 512 GB versiyasi esa 10 999 yuan ($1,53 ming) etib belgilangan. Eng yuqori konfiguratsiya 16 GB tezkor xotira va 1 TB xotiraga ega bo‘lib, 11 999 yuan ($1,67 ming) narxda sotiladi.
Model Red Rabbit Red, Sunrise Gold, Snow White va Velvet Black ranglarida taklif etiladi. Honor Magic V6 “black diamond screen” deb nomlangan yangi ekran texnologiyasiga ega. Kompaniya ma’lumotiga ko‘ra, tashqi ekran 5600 qatlamli silikon nitrid bilan qoplangan. Bu esa ekran chidamliligini uch barobarga oshiradi.
Buklanuvchi ekran esa maxsus past aks ettirish qoplamasiga ega. Uning aks ettirish darajasi atigi 1,5 foizni tashkil qiladi. Taqdimot vaqtida kompaniya ekran mustahkamligini namoyish qilish uchun unga elektr burg‘usi bilan bosim qilgan. Honor ta’kidlashicha, ekran zarar ko‘rmagan.
Texnik xususiyatlar
Ichki ekran yangi “seamless crease” dizayniga ega. Bu texnologiya bukilish chizig‘ini avvalgi modelga nisbatan 44 foizga kamaytiradi.
Displey tuzilmasida aks ettirishga qarshi qatlam, zarbaga chidamli UTG shisha va karbon tolali tayanch qatlam mavjud. Kompaniya ma’lumotiga ko‘ra, bu tizim zarbaga chidamlilikni 33 foizga oshiradi. Ichki ekran maksimal 5000 nit yorqinlikka chiqishi mumkin. Tashqi ekran esa 6000 nit yorqinlikni qo‘llab-quvvatlaydi. Ikkala displey ham 4320 Hz PWM dimming texnologiyasiga ega va stilus bilan ishlaydi.
Smartfon juda yupqa dizaynga ega. Qurilma buklangan holatda 8,75 mm, ochilganda esa 4 mm qalinlikka ega. Og‘irligi 219 grammni tashkil qiladi.
Korpus aerokosmik darajadagi alyuminiy ramkadan tayyorlangan. Qurilma IP68 va IP69 himoya standartlariga ega. Smartfon 4 metr chuqurlikdagi suvda ham ishlay oladi. Magic V6 7 150 mAh sig‘imli Silicon-Carbon batareya bilan jihozlangan. Batareyaning energiya zichligi 985 Wh/L ni tashkil etadi. Kompaniya bu ko‘rsatkich buklanuvchi smartfonlar orasida rekord ekanini ta’kidlaydi.
Kamera tizimi
Kamera tizimida 64 megapikselli telefoto modul ishlatilgan. U 1/2 dyuymli sensor va CIPA 6.5 darajasidagi stabilizatsiyani qo‘llab-quvvatlaydi.
Smartfonda AiMAGE rang dvijogi va sun’iy intellektga asoslangan fotografiya funksiyalari ham mavjud. Ular orasida aqlli kompozitsiya va ikki ekranli suratga olish rejimi bor. Honor shuningdek “AI Intelligence Officer” funksiyasini ham joriy etdi. Bu tizim foydalanuvchiga yangiliklar yoki rejalashtirilgan kontentni avtomatik taklif qiladi.
Magic V6 14 ta til uchun AI tarjimani qo‘llab-quvvatlaydi. Qurilmada real vaqt ekran tarjimasi ham mavjud. Smartfon 25 ta 5G diapazonini qo‘llab-quvvatlaydi va 200 dan ortiq hududda ishlashi mumkin. Shuningdek, u Xitoyda BeiDou sun’iy yo‘ldosh orqali SMS yuborish funksiyasini ham qo‘llab-quvvatlaydi.
Qiziqarli jihati shundaki, qurilma Apple ekotizimi bilan ham ishlay oladi. Foydalanuvchilar iCloud Photo Library ga kirishi, Mac bilan simsiz ulanishi va fayllarni bir tegish bilan uzatishi mumkin. AirPods va Apple Watch bilan ham integratsiya mavjud.
Qaynoq24.uz Honor 10 000 mA/soat akkumulyatorli smartfonini tayyorlayotgani haqida yozgan edi.
