HONOR kompaniyasining yangi HONOR X9d smartfoni Vyetnamdagi mashhur Dinh tog‘ida o‘tkazilgan 48 soatlik chidamlilik sinovida o‘zining mustahkamligi va uzoq ishlash imkoniyatlarini namoyish etdi. Murakkab relyef, nam iqlim, keskin ob-havo almashinuvi va jismoniy yuklama qurilma uchun jiddiy sinov bo‘ldi. Bu haqda Vyetnamning Báo Thanh Niên nashri xabar bermoqda.
Sinov davomida HONOR X9d tog‘li hududlarda doimiy harakat, yuqori yorqinlikda xarita ko‘rish, foto va video suratga olish, musiqani uzluksiz ijro etish kabi vazifalarni bajardi. Smartfon sinov boshida yuz foiz zaryad bilan yo‘lga chiqqan.
Bir necha soatlik uzluksiz ko‘tarilishdan so‘ng ham batareya zaryadi deyarli kamaymagan. Olti soatdan ortiq harakatdan keyin qurilmada zaryad darajasi to‘qson foizdan yuqori bo‘lib qoldi. Kechqurun film tomosha qilish, o‘yinlar va musiqa tinglashga qaramay, tun oxiriga kelib ham zaryad yarmi saqlanib qoldi.
Ikkinchi kuni HONOR X9d boshqa qurilmalarni ham quvvatlash uchun ishlatildi. Smartfon 7,5 vattli teskari quvvatlash funksiyasi orqali ekshen-kamerani quvvatlantirdi. Hatto zaryad ikki foizga tushganida ham energiyani tejash rejimi orqali ishlashda davom etdi. Natijada qurilma to‘liq 48 soatlik sinovni o‘chmasdan yakunladi.
Zarba, tushish va hatto pichoqsiz sinov
Tog‘li hududda telefon bir necha bor yerga tushgan. Himoya plyonkasi tirnalgan bo‘lsa-da, asosiy ekran shikastlanmagan. Sensor ishlashi, ramka va korpusda jiddiy zarar qayd etilmadi. Hatto issiq sho‘rva to‘kilishi va telefon yordamida tarvuz kesish kabi noodatiy holatlardan so‘ng ham qurilma to‘liq ishlashda davom etdi.
IP69K darajadagi suv va changdan himoya
Sinov chog‘ida HONOR X9d suv oqimi ostida ham ishlatilgan. Sensorli ekran ho‘l qo‘l bilan ham muammosiz ishlagan. Ishtirokchilardan biri hatto oqar suv ichida o‘tirgan holda smartfonda o‘yin o‘ynagan. Ushbu holat qurilmaning IP69K darajadagi himoyaga ega ekanini amalda tasdiqladi.
Kamera va sun’iy intellekt imkoniyatlari
Mustahkamlikka urg‘u berilganiga qaramay, HONOR X9d kamera imkoniyatlari bilan ham ijobiy baholandi. O‘zgaruvchan yorug‘lik sharoitida 108 megapikselli kamera tasvir tafsilotlarini saqlab qoldi, ranglar tabiiy chiqdi. Sun’iy intellekt yordamida suratlarni tahrirlash, fonni kengaytirish va keraksiz obyektlarni olib tashlash funksiyalari kontent yaratishda qulaylik yaratdi.
Narx va kafolat shartlari
HONOR X9d 6-dekabr kuni rasmiy taqdim etildi. Smartfon uch rangda taklif qilinmoqda: sariq, qora va qizil. Xotira konfiguratsiyasiga qarab narxlar 9,99 milliondan 11,99 million donggacha baholanmoqda. Aksiya davrida xaridorlarga chegirmalar va sovg‘alar taklif etilmoqda.
Shuningdek, foydalanuvchilar HONOR Ultimate Care kafolat paketi doirasida 100 kun ichida almashtirish, ikki yillik kafolat, ekran va suvdan himoya sug‘urtasi hamda batareya sig‘imi kafolatiga ega bo‘ladi.
Qaynoq24.uz Honor’ning 10 800 mA/soat batareyaga ega smartfonining tafsilotlari ma’lum bo‘lgani haqida yozgan edi.
