Janubiy Koreyaning janubi-sharqiy qirg‘og‘ida qoya ustiga urilgan qayiqdagi barcha 267 kishi xavfsiz qutqarildi. Bu haqda mamlakat Sohil xavfsizlik xizmati ma’lum qildi.
“Queen Jenuvia 2” nomli parom hozircha rifdan chiqolmayapti, ammo cho‘kish yoki ag‘darilish xavfi yo‘q. Hodisa chorshanba kuni kechqurun, Sinan okrugidagi Jangsan oroli yaqinida sodir bo‘ldi. Kema aholi yashamaydigan Jogdo oroli yonida qoyalarga urilgan.
Zarb oqibatida 27 kishi yengil jarohat olgan. Qolgan yo‘lovchilar va ekipaj a’zolari shikastlanmagan.
Guvohlarning aytishicha, kema to‘satdan katta shovqin bilan larzaga kelgan, shundan keyin bort egila boshlagan. Keyinchalik ekipaj yo‘lovchilarga xavfsiz kiyimlarni kiyib, yuqori qavatga ko‘tarilish haqida e’lon qilgan.
26 ming tonnalik parom Jeju orolidan chiqib, Mokpo portiga yo‘l olgan edi. Bu hudud 2014-yilda 300 dan ortiq o‘quvchi halok bo‘lgan dahshatli “Sewol” paromi fojiasi sodir bo‘lgan joy yaqinida joylashgan. “Sewol” paromi qoldiqlari uch yil o‘tib aynan Mokpoga olib kelingan.
Sohil xavfsizlik xizmati paromni eng yaqin baland to‘lqin vaqtida qirg‘oqqa chiqarishni rejalashtirmoqda.
Avvalroq Qaynoq24.uz nashri Italiyada kuchli yomg‘irlar sabab ikki kishi bedarak yo‘qolgani haqida yozgan edi.
Mahalliy OAV xabariga ko‘ra, ikki kishi bedarak yo‘qolgani aytilmoqda. Qutqaruvchilar vayronalar ostidan bir kishini tirik holda olib chiqqan. U Udine shahridagi shifoxonaga singan oyog‘i bilan yetkazilgan.
Bedarak yo‘qolganlar — 35 yoshli erkak va yoshi katta ayol. Gorizia gubernatori Ester Fedullo ma’lumotiga ko‘ra, erkak ayolni qutqarishga uringanda kuchli suv oqimi uni oqizib ketgan.
So‘nggi kunlarda Italiya shimoli-g‘arbiy va shimoli-sharqiy hududlari hamda Sloveniya g‘arbida kuchli yomg‘ir yog‘ib, o‘nlab ko‘chkilar va suv toshqinlariga sabab bo‘ldi. Friuli Venezia Giulia mintaqasidagi Cormonsda ko‘chki oqibatida ikki kishi halok bo‘lgan. Romans d’Isonzo hududidan 300 ga yaqin aholi xavfsiz joyga ko‘chirilgan.
