Microsoft korporatsiyasi Google Chrome brauzeridan foydalanayotgan foydalanuvchilarni o‘zining Edge brauzeriga o‘tkazish uchun yangi reklama usulini ishga tushirdi. Bu haqda Windows Report nashri xabar bermoqda. Jurnalistlar ta’kidlashicha, kompaniya bu safar yanada agressiv yondashuvni tanlagan.
Ma’lum bo‘lishicha, Windows operatsion tizimiga o‘rnatilgan Edge brauzeri orqali Google Chrome’ni yuklab olish sahifasiga kirilganda, foydalanuvchi oldida Microsoft brauzerining afzalliklari ko‘rsatilgan maxsus oynacha paydo bo‘ladi. Unda Edge’ning Chrome’ga nisbatan ustun jihatlari sanab o‘tiladi.
Mutaxassislarning qayd etishicha, ilgari Microsoft reklamalarda Edge va Chrome o‘rtasida katta farq yo‘qligini, chunki har ikkisi ham Chromium dvijogi asosida ishlashini ta’kidlardi. Biroq hozirgi kampaniyada kompaniya asosiy e’tiborni onlayn xavfsizlik masalasiga qaratmoqda.
Reklamadagi havolani bosganda internetdagi xavfsizlikka bag‘ishlangan sahifa ochiladi. Unda Edge brauzeridagi maxfiy ko‘rish rejimi, parollar monitoringi, firibgarlik va zararli dasturlardan himoya, shuningdek, boshqa xavfsizlik funksiyalari alohida ta’kidlanadi. Jurnalistlar fikricha, Microsoft endilikda brauzerlar dvijogidan ko‘ra, foydalanuvchilar xavfsizligini asosiy ustunlik sifatida ko‘rsatishga harakat qilmoqda.
Qaynoq24.uz Microsoft’ning pullik yangilanishi Windows 10 ishida muammolar keltirib chiqargani haqida yozgan edi.
