OnePlus kompaniyasining yangi OnePlus 16 smartfoni kuchli kamera yangilanishlari bilan chiqishi mumkin. Bu haqda Gizchina nashri xabar berdi. Ma’lumotlarga ko‘ra, smartfon hozircha sinov bosqichida bo‘lib, unda 200 MP asosiy kamera va 50 MP periskop kamera test qilinmoqda.
200 MP sensor hozirgi ko‘plab flagmanlarda qo‘llanilayotgan 50 MP kameradan ancha yuqori aniqlikka ega. Bu esa suratlarda mayda detallarni yaxshiroq ko‘rsatish va rasmni kesib ishlaganda ham sifatni saqlab qolish imkonini beradi. Mutaxassislar fikricha, kamera piksel birlashtirish texnologiyasidan foydalanishi mumkin. Bunda bir nechta piksel bitta kattaroq pikselga birlashtiriladi. Bu ayniqsa tungi suratlarda shovqinni kamaytirishga yordam beradi.
Smartfonda 50 MP periskop kamera ham bo‘lishi kutilmoqda. Bunday kamera telefonga qalinlik qo‘shmasdan uzoq masofani optik zum orqali yaqinlashtirish imkonini beradi. Hozircha zum darajasi haqida aniq ma’lumot berilmagan.
Insayderlar OnePlus kamera sifatini yaxshilash uchun LUMO nomli tasvirni qayta ishlash tizimini ham faol takomillashtirayotganini aytmoqda. Zamonaviy smartfonlarda surat sifati ko‘pincha aynan dasturiy ishlovga bog‘liq bo‘ladi. Qurilmaning rasmiy taqdimoti 2026-yil oxirida bo‘lishi mumkin.
Qaynoq24.uz OnePlus Turbo 6 399 dollardan sotuvga chiqqani haqida yozgan edi.
