12-dekabr kuni Qirg‘izistonning tarixiy O‘sh shahrida buyuk shoir, davlat va jamoat arbobi, turkiy dunyo mutafakkiri Alisher Navoiy haykali tantanali ravishda ochildi. Mazkur tadbir Markaziy Osiyo xalqlari uchun umumiy bo‘lgan boy madaniy merosga bo‘lgan yuksak ehtiromni yana bir bor namoyon etdi.
Tantanali marosimda O‘sh shahri aholisi bilan bir qatorda yuqori martabali rasmiylar ham ishtirok etdi. Jumladan, O‘zbekiston Respublikasi madaniyat vaziri Ozodbek Nazarbekov, Andijon viloyati hokimi Shuhrat Abdurahmonov, O‘sh shahri meri Jenishbek Toktorboyev, Qirg‘iziston Prezidenti vakili Amanqan Kenchebayev hamda Qirg‘iziston madaniyat, axborot, sport va yoshlar siyosati vaziri o‘rinbosari Askarali Madaminov marosimda qatnashdi.
Marosimda so‘zga chiqqan O‘zbekiston madaniyat vaziri Ozodbek Nazarbekov Alisher Navoiyni Markaziy Osiyo xalqlarini birlashtiruvchi muhim ma’naviy ko‘prik sifatida ta’rifladi. Uning ta’kidlashicha, buyuk shoir o‘z asarlarida insonparvarlik, adolat, ilm-fan, donishmandlik va xalqiga sadoqat g‘oyalarini yuksak badiiy mahorat bilan ulug‘lagan.
Vazirning so‘zlariga ko‘ra, O‘sh shahrida Alisher Navoiy haykalining o‘rnatilishi umumiy tarixiy xotira va madaniy merosga bo‘lgan hurmat ifodasi bo‘lib, qardosh xalqlar o‘rtasidagi do‘stlik va hamjihatlikni yanada mustahkamlaydi. Ushbu haykal yosh avlodni ilm, ezgulik va bunyodkorlik ruhida tarbiyalashga xizmat qiladigan muhim maskanga aylanishi qayd etildi.
Qaynoq24.uz O‘zbekistonda “Kelajak merosi” xalqaro mukofoti ta’sis etilgani haqida yozgan edi.
