O‘zbekistonda 2025-yil yanvardan noyabrgacha belgilanmagan joylarga chiqindi tashlash bo‘yicha qariyb 10 ming holat qayd etildi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar bermoqda.
Vazirlik huzuridagi ishchi guruh respublika bo‘ylab o‘rnatilgan IP-kameralar orqali doimiy kuzatuv olib bordi va 9817 ta qonunbuzarlikni aniqladi.
Huquqbuzarliklarning 3714 tasi transport vositalaridan chiqindi tashlash bilan bog‘liq bo‘ldi. Aniqlangan holatlarning 2232 tasi bo‘yicha jarima qo‘llanildi. Yana 7585 ta holat bo‘yicha hozirda choralar ko‘rilmoqda.
Eng ko‘p holatlar Andijon, Namangan va Farg‘ona viloyatlarida qayd etilgan. Samarqand, Toshkent viloyati va Surxondaryoda ham chiqindini noqonuniy tashlash ko‘rsatkichlari yuqori bo‘lgan. Ayrim hududlarda holatlar soni kam bo‘lsa-da, kuzatuv doimiy davom etayotgani aytiladi.
Jadval:
| Hudud | Holatlar soni |
|---|---|
| Andijon viloyati | 3001 |
| Namangan viloyati | 2937 |
| Farg‘ona viloyati | 1645 |
| Samarqand viloyati | 981 |
| Toshkent viloyati | 434 |
| Surxondaryo viloyati | 250 |
| Sirdaryo viloyati | 144 |
| Toshkent shahri | 121 |
| Xorazm viloyati | 117 |
| Navoiy viloyati | 99 |
| Qashqadaryo viloyati | 70 |
| Jizzax viloyati | 16 |
| Buxoro viloyati | 2 |
Jarima qo‘llangan 2232 ta holat bo‘yicha umumiy jarima miqdori 956 mln 887 ming so‘mni tashkil etdi.
Vazirlik onlayn kuzatuv kameralarining samaradorligini alohida qayd etib, ular nafaqat chiqindi tashlash, balki boshqa ekologik huquqbuzarliklarni ham aniqlash va tezkor chora ko‘rish imkonini berayotganini ma’lum qildi.
Avvalroq Qaynoq24.uz nashri Toshkentda chiqindilarni yig‘ish jarayoniga GPS nazorat joriy qilingani haqida yozgan edi.
