Respublikada metan zapravkalar faoliyati cheklangani fonida «O‘zbekneftgaz» birja savdolariga benzin yetkazib berish hajmini oshiradi. Bu haqda kompaniyaning Telegram kanalida ma’lum qilindi.
Kompaniya bayonotiga ko‘ra, avtomobil benzini bo‘yicha iste’mol talabini to‘liq qondirish masalasi davlat nazoratiga olingan. Buning uchun barcha zarur choralar ko‘rilgan. Hududlar kesimida yetarli hajmda yoqilg‘i zaxiralari shakllantirilgani qayd etildi.
Shuningdek, xususiy AYoQSh egalari narxlarni asossiz oshirmaslikka va benzinni to‘liq hajmda sotishga chaqirildi. Kompaniya avtomobillar uchun yoqilg‘i narxining sun’iy oshishiga yo‘l qo‘yilmasligini ta’kidladi.
Rasmiy ma’lumotlarga ko‘ra, 19-yanvar kuni birja savdolariga jami 3,8 ming tonna benzin chiqarilgan. Ushbu hajmning 3,7 ming tonnasi AI-92, 190 tonnasi esa AI-91 markasiga to‘g‘ri kelgan. Savdo yakunlariga ko‘ra, birjada 3,4 ming tonnadan ortiq yoqilg‘i sotilgan.
Qaynoq24.uz metan “zapravkalar” faoliyatiga yana cheklov kiritilgani haqida yozgan edi.
