19-oktabr kuni kechqurun Palma de Mayorka aeroportida dron tufayli parvozlar vaqtincha to‘xtatildi. Bu haqda Euro Weekly news xabar berdi.
Hodisa mahalliy vaqt bilan soat 19:00 atrofida yuz bergan. Havo hududiga ruxsatsiz kirgan uchuvchisiz apparat xavfsizlikka tahdid solgani uchun aeroport parvoz va qo‘nishlarni vaqtincha to‘xtatgan. Natijada o‘ndan ortiq reyslar boshqa aeroportlarga yo‘naltirilgan.
Ispaniyaning havo dispetcherlik xizmati Enaire ijtimoiy tarmoq X (sobiq Twitter) orqali havo hududi buzilganini tasdiqladi. Oradan bir soat o‘tgach, aeroport faoliyati qayta tiklandi, biroq ayrim samolyotlar taxminan 1,5 soat kechikish bilan uchgan va qo‘ngan.
Mayorka aeroporti haqida
Palma de Mayorka aeroporti (IATA: PMI) — Ispaniyaning Balear orollarida, Palma shahrining sharqiy qismida joylashgan yirik xalqaro aeroport hisoblanadi. U shahar markazidan taxminan 8 kilometr masofada joylashgan bo‘lib, Yevropa va O‘rta Yer dengizi oralig‘idagi eng muhim havo markazlaridan biri sanaladi. 2024-yilda aeroport orqali 33 milliondan ortiq yo‘lovchi parvoz qilgan.
Palma aeroportida ikki uzun asfalt uchish-qo‘nish yo‘lagi mavjud bo‘lib, terminal majmuasi A, B, C va D modullaridan tashkil topgan. Binolarda bepul Wi-Fi, restoranlar, do‘konlar, dam olish zonalari va loungerlar mavjud. Aeroport yo‘lovchilarga avtomobil ijarasi, avtobus va taksi xizmatlari, shuningdek, kichik hayvonlar uchun qulay sharoitlarni ham taqdim etadi. Bugungi kunda Palma de Mallorca aeroporti Ispaniyaning eng gavjum havo bandargohlaridan biri bo‘lib, zamonaviy infratuzilma va yuqori darajadagi xizmat ko‘rsatish sifati bilan ajralib turadi.
