Qor ko‘chkisi xavfi sabab “Qamchiq” dovoni vaqtincha yopildi. Bu haqda FVV axborot xizmati xabar bermoqda.
10-dekabr kuni soat 02:30 dan boshlab A-373 xalqaro avtomobil yo‘lining “Qamchiq” dovoni qismi avtomobillar harakati uchun vaqtincha yopildi. Qaror hududda qor ko‘chkisi xavfi kuchaygani bilan izohlandi.
Favqulodda vaziyatlar vazirligi ma’lumotiga ko‘ra, ayni paytda vazirlik rahbarligi ostida tegishli tashkilotlar mutaxassislari tomonidan xavf oqibatlarini bartaraf etish va yo‘lni xavfsiz holatga keltirish bo‘yicha keng ko‘lamli profilaktik ishlar olib borilmoqda.
“Qamchiq” dovonining qayta ochilishi haqida FVV qo‘shimcha ma’lumot berishini ma’lum qilgan.
Qaynoq24.uz Favqulodda vaziyatlar vazirligi faoliyatini tartibga soluvchi yangi nizom tasdiqlangani haqida yozgan edi.
