Redmi o‘zining arzon smartfonlar imijidan tezda voz kechmoqda. Xitoy manbalariga ko‘ra, K100 seriyasi ilk bor 200 MP periskop telefoto kameraga ega bo‘lishi mumkin. Bu o‘rta segment uchun emas, balki to‘laqonli flagman darajasidagi kamera hisoblanadi.
Insayder Smart Pikachu ma’lumotiga ko‘ra, 200 MP periskop moduli hozirda ommaviy ishlab chiqarish sinovidan o‘tkazilmoqda. Bunday sensorlar uzoq masofali optik zoom uchun mo‘ljallanadi va oddiy “ramziy” telefoto kameralardan tubdan farq qiladi.
Xitoy bozori uchun ikki model tayyorlanmoqda. Oddiy Redmi K100 va K100 Pro Max. “Pro Max” nomining o‘zi Redmi’ning yuqori segmentga jiddiy kirib kelayotganini ko‘rsatadi. Bu toifa odatda ancha qimmat flagmanlar bilan raqobat qiladi.
Xalqaro bozorga esa smartfonlar boshqa nom ostida chiqadi. K100 global bozorda POCO F9 Pro nomini oladi. K100 Pro Max esa mutlaqo yangi POCO F9 Ultra sifatida taqdim etiladi. Bu POCO tarixidagi ilk “Ultra” modeli bo‘lishi mumkin.
Agar ma’lumotlar tasdiqlansa, POCO F9 Ultra birinchi bo‘lib 200 MP periskop kamera bilan chiqarilgan POCO smartfoniga aylanadi. Bu esa ko‘pchilik flagmanlarda ham uchramaydigan daraja hisoblanadi.
Hozirgi flagmanlar odatda 48 yoki 50 MP periskop kameradan foydalanadi. 64 MP yoki 108 MP kam uchraydi. 200 MP ga o‘tish esa agressiv qadam. Bunday sensor yorug‘lik masalasida qiyinchiliklar tug‘dirishi mumkin. Ammo agar Redmi buni dasturiy optimizatsiya bilan muvozanatlashtira olsa, bozor kuchli silkinishi mumkin.
Hozircha bu faqat sizib chiqqan ma’lumotlar. Sinovdan o‘tayotgan texnologiya oxir-oqibat ommaviy sotuvga chiqmasligi ham mumkin. Ammo Smart Pikachu avval ham Xiaomi ekotizimi bo‘yicha ishonchli ma’lumotlar bergan. Shu bois bu xabar jiddiy qabul qilinmoqda.
Qaynoq24.uz Redmi Turbo 5 Max smartfonini ta’mirlash qanchaga tushishi haqida yozgan edi.
