Xiaomi kompaniyasi Redmi Turbo 5 Max smartfonini rasman taqdim etdi. Bu haqda Gizmochina nashri xabar bermoqda. Yangi model Turbo 5 seriyasidagi narx va imkoniyatlar muvozanatiga yo‘naltirilgan flagman sifatida namoyish qilindi. Qurilma rekord darajadagi batareya sig‘imi, yangi avlod protsessori va zamonaviy dizayni bilan ajralib turadi.
Smartfon 6,83 dyuymli OLED displey bilan jihozlangan. Ekran 1,5K aniqlikni, 120 Hz yangilanish chastotasini va 3 500 nitgacha yetadigan maksimal yorqinlikni qo‘llab-quvvatlaydi. Displey 3 840 Hz yuqori chastotali PWM va DC dimming texnologiyalari orqali ko‘zga tushadigan miltillashni kamaytiradi. HDR kontent uchun Dolby Vision texnologiyasi ham mavjud.
Korpus dizaynida yon tomoni CNC ishlov berilgan metall ramkadan, orqa panel esa shisha tolali materialdan tayyorlangan. Orqa qismda ikki halqali turbina uslubidagi yoritish elementi joylashtirilgan. Redmi Turbo 5 Max Shadow Black, Ocean Blue, Cloud White va Sunshine Orange ranglarida chiqarildi. Qurilma chang va suvdan himoya bo‘yicha IP66, IP68 va IP69 darajalariga ega.
Texnik jihatdan smartfon MediaTek Dimensity 9500s protsessori bilan ishlaydi. Ushbu chip Dimensity 9500’ning soddalashtirilgan versiyasi bo‘lib, unumdorligi Dimensity 9400 darajasida baholanmoqda. Qurilma 16 GB gacha LPDDR5X tezkor xotira va 512 GB gacha UFS 5.1 ichki xotira bilan taklif etiladi. Bunday konfiguratsiya og‘ir o‘yinlar va ko‘p vazifali ishlashda yuqori samaradorlikni ta’minlaydi.
Redmi Turbo 5 Max Android 16 asosidagi HyperOS 3 tizimida ishlaydi. Qurilmada Wi-Fi 6, Bluetooth 5.4, NFC, ekran ostiga o‘rnatilgan ultratovushli barmoq izi skaneri, stereo dinamiklar, infraqizil port va ikki nano SIM qo‘llab-quvvatlanadi.
Smartfonning eng asosiy jihati uning 9 000 mA/soatli batareyasidir. Bu Redmi liniyasi tarixidagi eng katta sig‘im hisoblanadi. Qurilma 100 Vt quvvatli tezkor simli zaryadlashni va 27 Vt quvvatli teskari zaryadlashni qo‘llab-quvvatlaydi. Xiaomi ma’lumotiga ko‘ra, smartfon 11 soatdan ortiq faol ekran vaqti ta’minlay oladi.
Kamera imkoniyatlariga to‘xtaladigan bo‘lsak, Redmi Turbo 5 Max 50 megapikselli Light Fusion 600 asosiy kameraga ega. Sensor o‘lchami 1/1,95 dyuymni tashkil etadi va OIS hamda EIS tizimlari bilan jihozlangan. Unga 8 megapikselli ultra keng burchakli modul hamrohlik qiladi. Ikkala kamera ham 4K formatda 60 kadr tezlikda video yozishni qo‘llab-quvvatlaydi.
Narx:
| Konfiguratsiya | Narx ($) |
|---|---|
| 12 GB + 256 GB | $359 |
| 16 GB + 256 GB | $402 |
| 12 GB + 512 GB | $402 |
| 16 GB + 512 GB | $445 |
Redmi Turbo 5 Max hozircha Xitoy bozorida sotuvga chiqarilgan. Xalqaro bozorga chiqishi rasman e’lon qilinmagan, biroq Turbo seriyasi keyinchalik ayrim mamlakatlarda POCO brendi ostida taqdim etilishi mumkin.
Qaynoq24.uz Redmi Turbo 5 Max qanday imkoniyat bilan chiqishi haqida yozgan edi.
