Prezident Administratsiyasi rahbari Saida Mirziyoyeva Devid Bednar boshchiligidagi biznes delegatsiyasi Toshkentda uchrashuv o‘tkazdi. Muloqotda O‘zbekiston va AQSh munosabatlari rivojida yangi bosqich boshlanganini qayd etildi.
Uchrashuvda prezident Shavkat Mirziyoyevning AQSh fuqarolari uchun vizasiz tartib joriy etish qarori muhim qadam sifatida baholandi. Bu qaror ishbilarmonlik va gumanitar aloqalarni kengaytirishga xizmat qilishi aytildi.
Shuningdek, prezident farmoni bilan Amerika – O‘zbekiston ishbilarmonlik va investitsiya kengashi tashkil etilishi ma’lum qilindi. Kengash faoliyatini muvofiqlashtirish uchun O‘zbekistonning AQShdagi elchixonasi tarkibida maslahatchi-elchi lavozimi joriy etilmoqda.
Farmonga ko‘ra, O‘zbekiston rezidentlari endi O‘zbekiston banklaridagi hisobvaraqlaridan mablag‘larni AQShda korxonalar tashkil etish, ularning kapitalida ishtirok etish yoki filiallarini moliyalashtirish uchun erkin o‘tkazishi mumkin bo‘ladi.
Avvalroq Qaynoq24.uz nashri O‘zbekiston va AQSh o‘rtasida yangi ishbilarmonlik va investitsiya kengashi tuzilishi haqida yozgan edi.
