2026-yilda Samsung smartfon bozorida ikkita yo‘nalishga urg‘u berishi kutilmoqda: flagmanlarda “AI + barqaror unumdorlik”, ommabop segmentda esa arzonroq narxda uzoq ishlaydigan batareya va 5G. Reuters’ga ko‘ra, kompaniya 2026-yilda “Galaxy AI” funksiyalari o‘rnatilgan mobil qurilmalar sonini 400 milliondan 800 milliontagacha oshirishni rejalashtirgan. Bu SI imkoniyatlari, asosan, Google Gemini bilan integratsiya orqali kengaytirilishi aytiladi. Quyida Samsung 2026-yilda qanday smartfonlarni taqdim etishi va ularga doir eng muhim ma’lumotlar jamlandi.
Galaxy S26 seriyasi
Samsung‘ning 2026-yildagi eng muhim taqdimoti odatdagidek Galaxy S liniyasi bo‘lishi kutilmoqda. Bir qator manbalarda Galaxy S26 seriyasi 2026-yil fevral oxirlarida e’lon qilinishi haqida yozilmoqda. Ayrim nashrlar taqdimot San-Fransiskoda 25-fevral atrofida bo‘lishi mumkinligini tilga oladi.
Galaxy S26 Ultra
S26 Ultra atrofidagi eng ko‘p muhokama qilinayotgan nuqta — korpus materiali. Insayder Ice Universe tilga olgan rang nomlarida “Titanium” so‘zi ko‘rinmagani bozor kuzatuvchilarini Samsung titan ramkadan voz kechishi mumkin, degan xulosaga olib keldi. Mazkur taxmin PhoneArena va AndroidHeadlines kabi nashrlarda ham muhokama qilindi.
Dizayn tomonda esa The Verge OnLeaks materiallariga tayangan holda S26 Ultra’da “ko‘tarilgan kamera orolchasi”ga o‘xshash yechim ko‘rinishi mumkinligini yozdi. Bu telefon stol ustida yotganda “tebranish” effektini kuchaytirishi ham ehtimol sifatida tilga olinmoqda.
Batareya masalasida esa bir-biriga zid xabarlar bor: ayrim manbalar katta sakrash bo‘lmasligini, boshqalari esa biroz o‘sish ehtimolini yozadi. Masalan, Forbes 2025-yil dekabrida Ultra’da “katta batareya sakrashi” bo‘lmasligi mumkinligini muhokama qilgan.
Galaxy S26 va S26 Plus: “klassik” duet qaytishi mumkin
Ayrim nashrlarda S26 Plus modeli ham qaytishi mumkinligi, hatto “Edge” kabi ingichka variant o‘rnini bosishi ehtimoli tilga olinadi. Bu yo‘nalish bo‘yicha qat’iy rasmiy tasdiq yo‘q, ammo maket/dummy’lar haqidagi xabarlar mavzuni yana kun tartibiga olib chiqdi.
One UI 8.5: kamera va maxfiylikda yangilanishlar
2026-yil flagmanlari yangi One UI versiyasi bilan kelishi kutilmoqda. One UI 8.5’da kamera interfeysi “soddaroq” formatga o‘tishi, LOG va HDR kabi pro-sozlamalar ko‘proq ko‘zga tashlanadigan joyga chiqarilishi mumkinligi haqida bir nechta manba yozdi.
Shuningdek, TechRadar One UI 8.5 beta kodlarida “Privacy Display” (ekranni yon tomondan ko‘rishni qiyinlashtiruvchi) funksiyasi haqida gap ketganini yoritgan.
Galaxy Z Fold 8 va Galaxy Z Flip 8
Samsung bukiladigan smartfonlarda yetakchilikni saqlab qolishga urinadi. 2026-yilda Z Fold 8 va Z Flip 8 modellari yozgi taqdimot oynasida, an’anaviy tarzda iyul atrofida e’lon qilinishi mumkinligi haqida bir nechta nashrlar yozmoqda.
Ushbu avloddan kutilayotgan asosiy yo‘nalish — vaznni kamaytirish va batareyani kattalashtirish. TechRadar Janubiy Koreyadagi manbaga tayangan holda Fold 8 “ancha yengil” bo‘lishi va batareya sig‘imi oshishi mumkinligini tilga oldi.
Ommabop segment: Galaxy A va F/M liniyalarida 5G va katta batareya
Samsung 2026-yilda ham arzon va o‘rta segmentni kuchli ushlab turishi kutiladi. Bu yo‘nalishda “sertifikatsiya bazalari” va “test serverlari”da ko‘rinayotgan qurilmalar odatda yaqin taqdimotlardan darak beradi.
Galaxy A07 5G
Gadgets360 va PhoneArena materiallarida Galaxy A07 5G turli bazalarda ko‘ringani, ayrim ma’lumotlarda 6 000 mA/soat batareya ehtimoli tilga olingani yozilgan.
Galaxy F07 5G
SammyGuru xabarida Galaxy F07 5G Samsung test serverlarida ko‘ringani, u A-seriyaga yaqin platformada bo‘lishi mumkinligi haqida taxminlar bor. Bu ham “arzon 5G + katta batareya” strategiyasiga mos keladi.
Qaynoq24.uz nashri eng omadsiz Samsung smartfonlari haqida yozgan edi.
