Samsung budjet segmentida raqobatni kuchaytirishda davom etmoqda. Kompaniya yaqinda ikki arzon, ammo ommabop bo‘lishi kutilayotgan smartfon — Galaxy A07 va Galaxy A17 5G modellarini taqdim etdi. Quyida ushbu qurilmalar dizayni, ekran sifati, unumdorligi, kameralar imkoniyati va boshqa jihatlar bo‘yicha professional tahlil beriladi.
Dizayn va ergonomika
Galaxy A07 plastik korpusga ega bo‘lib, orqa panelida yengil tekstura qo‘llangan. Qurilma 184 gramm vaznga ega va 7,6 mm qalinlikda bo‘lgani uchun qo‘lda qulay ushlanadi, biroq qopqoq tezda barmoq izlarini yig‘adi. Galaxy A17 5G ham plastikdan ishlangan, ammo old tomonida Gorilla Glass Victus himoyasi mavjud. Uning orqa qismi plastikka aralashtirilgan shisha tolali materialdan yasalgan bo‘lib, tashqi ko‘rinishi yanada jiddiy. Vazni 192 gramm, qalinligi 7,5 mm. Har ikkala model IP54 himoya standartiga ega. Yomg‘irdan himoyalaydi, ammo suvga tushirish mumkin emas.
Ekran sifati
Galaxy A07’da 6,7 dyuymli PLS LCD panel qo‘llangan. Uning 90 Gts yangilanish chastotasi va HD+ o‘lchamdagi displeyi kundalik foydalanish uchun yetarli, ammo yorqin quyosh ostida ekran yorqinligi pastlik qiladi. Galaxy A17 5G esa yuqori sifatli 6,7 dyuymli Super AMOLED displey bilan jihozlangan. Full HD+ aniqlikdagi ekran 800 nitgacha yorqinlik beradi va ranglar ancha jonli. Ammo past chastotali ShIM tufayli ayrim foydalanuvchilarda uzoq foydalanishda ko‘z charchashi kuzatilishi mumkin.
Protsessor va unumdorlik
Galaxy A07 MediaTek Helio G99 chipseti asosida ishlaydi. U 4 GB operativ xotira va UFS 2.2 doimiy xotira bilan birgalikda kundalik vazifalar hamda o‘rta darajadagi mobil o‘yinlarni barqaror bajara oladi. Galaxy A17 5G esa Samsung‘ning o‘z chipi — Exynos 1330 bilan ishlaydi. U ham xuddi 4 GB tezkor xotira va UFS 2.2 xotira turiga ega. Ikkala protsessor bir-biriga yaqin quvvat taklif qiladi, biroq har ikkisi o‘rta grafik sozlamalarda zamonaviy o‘yinlarni bemalol ishlatadi.
Kameralar imkoniyati
Galaxy A07 oddiy ikkilamchi kameralar tizimi bilan jihozlangan: 50 MP asosiy modul va 8 MP qo‘shimcha kamera. Natijalar ijtimoiy tarmoqlar uchun yaxshi, biroq imkoniyatlar cheklangan. Galaxy A17 5G‘da esa yanada rivojlangan tizim — 50 MP asosiy kamera, 5 MP ultra keng va 2 MP yordamchi sensor mavjud. Asosiy modul optik stabilizatsiyaga ega bo‘lib, bu suratlarni barqaror olishda katta qo‘l keladi. Old kamera ham kuchliroq — 13 MP. Shu sababli Galaxy A17 5G umumiy surat sifati bo‘yicha aniq ustun.
Dasturiy ta’minot va yangilanishlar
Har ikki smartfon One UI tizimi bilan ishlaydi. Interfeys silliq animatsiyalar, qulay menyular va keng moslashtirish imkoniyatiga ega. Samsung ikki modelga ham 6 yilgacha yangilanishlar va’dasini bergan — bu budjet segmenti uchun juda yaxshi ko‘rsatkich.
Batareya va avtonomiya
Galaxy A07 va A17 5G bir xil — 5000 mA·soat sig‘imli akkumulyator bilan jihozlangan. 25 Vt quvvatlash qo‘llab-quvvatlanadi. Galaxy A07 ekrani past aniqlikda bo‘lgani sababli biroz ko‘proq ishlash vaqtini taqdim etadi. Ikkalasi ham taxminan 1 soat 16 daqiqada to‘liq quvvatlanadi.
Qo‘shimcha imkoniyatlar
Galaxy A07 3,5 mm audio ulagichiga ega, bu ko‘pchilik uchun afzallik. Shuningdek, unda alohida microSD kartasi uchun slot mavjud. Galaxy A17 5G‘da esa NFC moduli bor — bu to‘lovlarni amalga oshirishda juda qulay. Lekin microSD kartasi uchun qo‘shimcha slot yo‘q, ikkinchi SIM o‘rnini bo‘shatish talab qilinadi. Har ikki model yon tomonda joylashgan barmoq izlarini o‘qiydigan skaner bilan jihozlangan.
Qaynoq24.uz Samsung Galaxy S26 Plus va S26 Ultra smartfonlari haqida yozgan edi.
