2026-yilda taqdim etilishi kutilayotgan Samsung Galaxy A57 smartfoni Xitoyning TENAA bazasida paydo bo‘ldi. Sertifikatsiya hujjatlari qurilmaning deyarli barcha asosiy texnik xususiyatlarini ochib berdi.
Avvalroq, 2025-yil noyabr oyida SM-A5760 model raqamiga ega Galaxy A57 3C sertifikatidan o‘tgan edi. Endi esa TENAA ro‘yxati Samsung’ning yangi o‘rta sinf smartfoni qanday bo‘lishini aniqroq ko‘rsatmoqda.
Dizayn va ekran
TENAA ma’lumotlariga ko‘ra, Galaxy A57 o‘lchamlari 161,5 × 76,8 × 6,9 mm’ni tashkil etadi. Qurilma og‘irligi 182 gramm bo‘lib, u o‘z segmentidagi eng yupqa smartfonlardan biri hisoblanadi.
Smartfon 6,6 dyuymli rangli displey bilan jihozlanadi. Ekran aniqligi Full HD+ bo‘lib, 1080 × 2340 pikselni tashkil etadi. Matritsa turi rasman ko‘rsatilmagan, biroq 16 million rangni qo‘llab-quvvatlashi AMOLED paneldan dalolat beradi. Displey osti barmoq izi skaneri ham mavjud bo‘ladi.
Protsessor va xotira
Galaxy A57 sakkiz yadroli protsessor asosida ishlaydi. Chip uch klasterli tuzilishga ega bo‘lib, yadrolarning maksimal chastotasi 2,9 GHz, 2,6 GHz va 1,95 GHz’ni tashkil etadi. Protsessor nomi TENAA’da ko‘rsatilmagan, ammo Geekbench’dagi testlar bu Exynos 1680 chipi bo‘lishi mumkinligini ko‘rsatmoqda.
Qurilma ikki xil konfiguratsiyada taqdim etilishi kutilmoqda:
- 8 GB operativ xotira va 256 GB doimiy xotira
- 12 GB operativ xotira va 256 GB doimiy xotira
Smartfon Android 16 operatsion tizimi va One UI 8 grafik interfeysi bilan chiqadi. Samsung’ning so‘nggi A-seriya modellari singari, Galaxy A57 ham olti yil davomida Android yangilanishlari va xavfsizlik patchlarini olishi mumkin.
Akkumulyator va quvvatlash
TENAA hujjatlariga ko‘ra, smartfon 4 905 mA·soat sig‘imli akkumulatordan foydalanadi. Bu amalda taxminan 5 000 mA·soat deb baholanadi. Oldingi 3C va TUV sertifikatlari Galaxy A57 45 Vt tezkor quvvatlashni qo‘llab-quvvatlashini tasdiqlagan.
Kamera imkoniyatlari
Galaxy A57 old tomonida 12 megapikselli selfi kamera bilan jihozlanadi. Orqa kamera bloki esa uch moduldan iborat bo‘ladi:
- 50 MP asosiy kamera
- 12 MP ultra keng burchakli kamera
- 5 MP makro kamera
Avvalgi xabarlarga ko‘ra, asosiy sensor sifatida Sony IMX906 ishlatilishi mumkin.
Taqdimot sanasi
Samsung Galaxy S26 flagman seriyasi fevral oxirida taqdim etilishi kutilmoqda. Shu munosabat bilan Galaxy A57 smartfoni Galaxy A37 modeli bilan birga flagmanlar taqdimotidan oldingi haftalarda bozorga chiqishi ehtimoli yuqori.
Qaynoq24.uz Samsung Galaxy S26 Ultra qanday ranglarda chiqishi haqida yozgan edi.
