Toshkent shahrida sifati kafolatlanmagan va yaroqlilik muddati o‘tgan dori vositalarining savdoga chiqarilishining oldi olindi. Bu haqda Departament xabar berdi.
Bosh prokuratura huzuridagi Departamentning Mirabad tumani bo‘limi xodimlari tomonidan o‘tkazilgan tezkor tadbirda «P.» MChJga tegishli dorixonada sotuvchi N.X. tomonidan sifati tasdiqlovchi hujjatlari bo‘lmagan va yaroqlilik muddati o‘tgan 490 turdagi dori vositalari savdoga qo‘yilgani aniqlangan. Ushbu dori vositalari ashyoviy dalil sifatida olingan.
Mazkur holat yuzasidan Jinoyat kodeksining 186-3-moddasi (sifatsiz yoki qalbaki dori vositalarini yoki tibbiy buyumlarni o‘tkazish maqsadida ishlab chiqish, tayyorlash, olish, saqlash, tashish yoki o‘tkazish, shuningdek tarkibida kuchli ta’sir qiluvchi moddalari bo‘lgan dori vositalarini retsept bo‘yicha chakana realizatsiya qilish tartibini buzish) bilan jinoyat ishi qo‘zg‘atilgan va tergov harakatlari o‘tkazilmoqda.
Qaynoq24.uz valyuta ayirboshlash bilan shug‘ullangan shaxslar ushlangani haqida yozgan edi.
