Toshkent shahrida 120 ming dollar miqdoridagi kredit mablag‘larini internetdagi qimor va tavakkalchilikka asoslangan o‘yinlarga sarflagan shaxslar fosh etildi. Bu haqda Bosh prokuratura huzuridagi Departament xabar berdi.
Ma’lum qilinishicha, holat Yashnobod tumanidagi tijorat banki filialining murojaati asosida o‘rganilgan. Tekshiruv davomida bank filiali bo‘lim boshlig‘i lavozimida ishlagan E.N. “A.” MChJ mas’ul shaxslari va boshqalar bilan kelishilgan holda “B.B.” MChJ nomiga $120 ming kredit ajratilishiga erishgani aniqlangan.
Keyinchalik soxta hujjatlar rasmiylashtirilgan. Kredit mablag‘i naqdlashtirilib olingan. Pul internet tarmoqlaridagi qimor va tavakkalchilikka asoslangan o‘yinlarga ishlatilgan.
Mazkur holat yuzasidan Jinoyat kodeksining 167-moddasi va 228-moddasi bilan jinoyat ishi qo‘zg‘atilgan. Hozirda tergov harakatlari olib borilmoqda.
Qaynoq24.uz Aviator savdo markazidagi yong‘in bo‘yicha jinoyat ishi qo‘zg‘atilgani haqida yozgan edi.
