Toshkent shahrida o‘tkazilgan tezkor tadbir davomida firibgarlikda gumonlangan advokat qo‘lga olindi. Bu haqda Davlat xavfsizlik xizmati ma’lum qildi.
Ma’lumotlarga ko‘ra, tadbir DXXning Toshkent shahar boshqarmasi hamda Iqtisodiy jinoyatlarga qarshi kurashish departamenti shahar boshqarmasi xodimlari hamkorligida o‘tkazilgan. Poytaxtda faoliyat yurituvchi, avval sudlangan advokat 2 ming AQSh dollari olayotgan vaqtida ashyoviy dalillar bilan ushlangan.
Aniqlanishicha, advokat Shayxontohur tumani IIO FMB Tergov bo‘limi ish yurituvidagi jinoyat ishi bo‘yicha gumonlanuvchiga nisbatan “qamoq” ehtiyot chorasi qo‘llanmasligini mansabdor tanishlari orqali hal qilib berishni va’da qilgan.
Hozirda unga nisbatan Jinoyat kodeksining 168-moddasi 3-qismi “v” bandi hamda 28 va 211-moddalari 1-qismi bilan jinoyat ishi qo‘zg‘atilib, “qamoq” ehtiyot chorasi qo‘llanilgan.
Hozirda tergov harakatlari olib borilmoqda.
Qaynoq24.uz 185 mln so‘mlik elektr energiyasidan noqonuniy foydalanish holati aniqlangani haqida yozgan edi.
