Toshkent shahrida tamaki mahsulotlarini noqonuniy sotish bilan shug‘ullangan shaxslar qo‘lga olindi. Bu haqda Bosh prokuratura huzuridagi Departament ma’lum qildi.
Uchtepa tumanida o‘tkazilgan tezkor tadbirda “F.T.” MChJga qarashli do‘kon sotuvchisi xaridorga xorijda ishlab chiqarilgan elektron tamaki mahsulotini 300 ming so‘mga sotgani aniqlangan. Tekshiruv davomida do‘kondan umumiy qiymati 174,6 mln so‘mlik mahsulotlar topildi. Gap 18 turdagi, jami 1 419 dona aksiz markasiz tamaki mahsulotlari haqida bormoqda. Ular daliliy ashyo sifatida olib qo‘yildi.
Mirobod tumanida ham shunga o‘xshash holat aniqlandi. Tezkor tadbirda fuqarolar A.S., M.X. va I.T. noqonuniy savdo bilan shug‘ullanib kelgani fosh etildi. Ular xorijda ishlab chiqarilgan 540 dona “Velo” tamaki mahsulotini 50 mln so‘m va $900 ga sotayotgan vaqtida qo‘lga olindi.
Mazkur holatlar yuzasidan Jinoyat kodeksining 186-1-moddasi bilan jinoyat ishlari qo‘zg‘atildi. Hozirda tergov harakatlari olib borilmoqda.
Qaynoq24.uz Koreyaga ishga yuborishni va’da qilib, 65 mln so‘m olgan shaxs aniqlangani haqida yozgan edi.
