Toshkent shahrida Soliq auditi bo‘limi bosh inspektoriga nisbatan jinoyat ishi qo‘zg‘atildi. Bu haqda jinoyat ishlari bo‘yicha Mirzo Ulug‘bek tuman sudida ko‘rilayotgan ish doirasida ma’lum qilindi.
Surxondaryoda ro‘yxatdan o‘tgan to‘qimachilik MChJsi faoliyatida o‘tkazilgan tafishda korxona zimmasiga qo‘shimcha 8,7 mlrd so‘m soliq hisoblandi. Sud 15 sentabr kuni qayta tafshish o‘tkazish haqida ajrim chiqargach, bosh inspektor mazkur soliqni bekor qilib berishini aytib, evaziga korxona vakillaridan 5 ming AQSh dollari olgani aniqlandi.
Ammo u hisoblangan soliqni bekor qila olmadi. Olgan 5 ming dollarni qaytarmoqchi bo‘lgan vaqtda Davlat xavfsizlik xizmati xodimlari tomonidan dalillar bilan ushlandi.
Bosh inspektorga Jinoyat kodeksining 210-moddasi 2-qismi “v” bandi (pora olish) bilan jinoyat ishi qo‘zg‘atildi va unga nisbatan qamoq ehtiyot chorasi qo‘llandi.
Avvalroq Qaynoq24.uz nashri Sirdaryoda ikki nafar IIB xodimi pora olayotganda ushlangani haqida yozgan edi.
