O‘zbekistonda naqd pulsiz to‘lovlarni ommalashtirish va yashirin iqtisodiyot ulushini qisqartirish bo‘yicha qo‘shimcha choralarni belgilovchi Prezident Farmoni (PF–246, 10.12.2025) qabul qilindi. Hujjatda 2030-yilgacha bo‘lgan asosiy maqsadli ko‘rsatkichlar belgilab berildi.
Farmonga ko‘ra, quyidagi vazifalar ustuvor yo‘nalish sifatida qayd etildi:
- Yalpi ichki mahsulotga nisbatan kuzatilmaydigan iqtisodiyot ulushini 1,3 baravarga qisqartirish;
- Savdo va xizmat ko‘rsatish sohalarida aholining naqd pulsiz to‘lovlari ulushini 75 foizga yetkazish.
Shuningdek, 2026-yil 1-apreldan boshlab bir qator yo‘nalishlarda to‘lovlar faqat bank kartalari yoki elektron to‘lov tizimlari orqali amalga oshiriladi. Bular:
- davlat organlari tomonidan ko‘rsatiladigan xizmatlar;
- elektr energiyasi, tabiiy gaz va ichimlik suvi uchun to‘lovlar;
- alkogol va tamaki mahsulotlari savdosi;
- yoqilg‘i quyish shoxobchalarida aholiga neft-gaz mahsulotlari sotish hamda elektrotransportlarni quvvatlantirish xizmatlari;
- 25 million so‘mdan yuqori qiymatdagi tovar va xizmatlar;
- ko‘chmas mulk obyektlari, ishlab chiqarilganiga 10 yildan oshmagan M, N, O va G toifasidagi transport vositalari hamda maxsus texnikalar oldi-sotdisi.
Farmon naqd pulsiz iqtisodiyotni jadallashtirish, shaffoflikni oshirish va pul aylanmalarini raqamlashtirishni maqsad qilgan.
Qaynoq24.uz O‘zbekistonda geografik ko‘rsatkichlar tizimini rivojlantirish uchun “oriGIn Uzbekistan” tashkil etilishi haqida yozgan edi.
