Mutaxassislar Xiaomi smartfonlarining asosiy kamchiligi sifatida ularning dasturiy ta’minot yangilanishlari bilan qisqa muddat qo‘llab-quvvatlanishini ko‘rsatdi. Bu haqda XiaomiTime ma’lum qildi.
Nashrning ta’kidlashicha, Xitoy kompaniyasi raqobatchilarga nisbatan smartfonlarini kamroq muddat davomida yangilanishlar bilan ta’minlaydi. Bunga sabab sifatida qurilmalar sonining juda ko‘pligi va kompaniyaning past rentabelli biznes modeli keltirilmoqda. Ya’ni, Xiaomi foydalanuvchilarga arzonroq smartfonlar taklif qilgani bois, ularning uzoq muddatli texnik qo‘llab-quvvatlanishiga kamroq mablag‘ ajratadi.
Mualliflarning tushuntirishicha, Apple yoki boshqa premium brendlar flagman modellarini 800 dollardan yuqori narxda sotadi va bundan katta foyda oladi. Xiaomi esa smartfonlarining o‘rtacha sotuv narxini 150–300 dollar atrofida ushlab turadi. Shu sababli kompaniya qurilmalarining aksariyati atigi 2–3 yil davomida tizim yangilanishlarini oladi.
Shuningdek, Xiaomi har yili juda ko‘p miqdorda yangi smartfon modellarini taqdim etadi. Ayrim qurilmalar turli bozorlarda bir nom ostida sotilsa-da, texnik jihatdan farq qilishi mumkin. Bu holat esa dasturiy ta’minotni qo‘llab-quvvatlash jarayonini yanada murakkablashtiradi.
Xiaomi global rasmiy saytida faqat hozirgi va yaqin modellarning ro‘yxati berilgan bo‘lsa-da, tarixan kompaniya 2011-yilda birinchi smartfonini chiqarganidan beri ikki yuzdan ortiq turli smartfon modeli ishlab chiqargan deb hisoblash mumkin.
Qaynoq24.uz Xiaomi 17 global bozorda tez orada taqdim etilishi haqida yozgan edi.
