Xitoy ishlab chiqaruvchilari yangi bronetransporter (BTR) ustida ish olib bormoqda, u tashqi ko‘rinishi bo‘yicha nemis “Boxer” seriyasiga juda o‘xshash. Bu haqda Defence Blog xabar berdi.
Yangi mashinaning suratlari internetda tarqaldi. Bronetransporter Baotou shahridagi (Ichki Mongoliya) sanoat zonasida kuzatilgan. Onlayn sharhlovchilar tomonidan u no rasmiy ravishda “AliExpress Boxer” deb atalmoqda. Mashina kompozitsiyasi va tuzilishi bo‘yicha nemis Rheinmetall-Krauss-Maffei Wegmann kompaniyasi ishlab chiqqan Boxer 8×8 BTR’iga o‘xshashligi qayd etilgan. Mazkur nemis BTR’idan NATOning bir necha davlatlari foydalanadi.
Yangi to‘rt o‘qli transporter V-shaklidagi taglik va modul tuzilishga ega bo‘lib, bu turli maxsus texnikalarni ishlab chiqishga imkon beradi.
Nemis “Boxer”lari 2009-yildan buyon Bundesverga yetkazib berilgan. 30 tonnadan ortiq vaznga ega mashina 720 ot kuchiga ega dizel dvigatel bilan jihozlangan bo‘lib, maksimal tezligi 103 km/soatni tashkil qiladi. Ushbu platforma asosida artilleriya o‘rnatmalari, zenit komplekslari, komandno-shtab va tibbiy mashinalar ishlab chiqariladi.
Shuningdek, Army Recognition nashri xabariga ko‘ra, Xitoy Xalq Ozodlik Armiyasi uchun ishlab chiqilgan yangi HQ-13 zenit raketa kompleksi Tayvanga ehtimoliy hujumlarda qo‘llanishi mumkin.
Qaynoq24.uz Hindiston Rossiyadan Su-57 qiruvchi samolyotlarini xarid qilishi mumkinligi haqida yozgan edi.
