Yaponiyaning shimolida 7,5 balli zilzila natijasida 23 kishini jarohatlandi. Bu haqda mahalliy nashrlar xabar bermoqda.
Kechasi ro‘y bergan kuchli yer silkinishi Yaponiyaning shimoliy hududlarini larzaga soldi. Zilzila ortidan sunami xavfi e’lon qilindi, biroq keyinroq ogohlantirishlar pasaytirildi. Asosiy holat Aomori sohilidan 80 km masofada, 50 km chuqurlikda qayd etildi. Zilzila 11:15 da sodir bo‘ldi. Dastlab uch metrgacha baland to‘lqinlar yuzaga kelishi mumkinligi aytildi. Hokkaydo, Aomori va Ivate prefekturalarida ogohlantirish berildi. Portlarda 20–70 sm balandlikdagi to‘lqinlar kuzatildi.
Yong‘in va favqulodda vaziyatlar agentligi 23 kishining jarohatlanganini bildirdi. Bir kishi og‘ir ahvolda ekani ma’lum qilindi. Ko‘pchilik yiqilgan buyumlardan jarohat olgan. Hachinohe shahridagi mehmonxonada bir necha mehmon jarohatlangan. Tohokuda bir haydovchi mashinasi chuqurga tushib ketib, yengil jarohat oldi.
Bosh vazir Sanae Takaichi aholiga tezda xavfsiz joyga chiqishni buyurdi. Hukumat aholiga balandroq hududlarga yoki maxsus boshpanalarga evakuatsiya qilishni eslatdi. Rasmiylarga ko‘ra, 800 ga yaqin uy elektrsiz qoldi. 480 kishi Hachinohe harbiy bazasida vaqtincha joylashtirilgan.
Mudofaa vazirligi 18 ta harbiy vertolyotni zararlarni baholash uchun parvozga chiqardi. Hokkaydodagi New Chitose aeroportida 200 yo‘lovchi tunab qolgan. East Japan Railway ba’zi poyezd qatnovlarini to‘xtatdi.
Hududdagi atom stansiyalarida xavfsizlik tekshiruvlari o‘tkazildi. Xalqaro atom agentligi Fukushima stansiyasida hech qanday nosozlik qayd etilmaganini ma’lum qildi.
Yaponiya dunyodagi eng seysmik faol hududlardan biri sanaladi. Mamlakatda kuchli zilzilalar tez-tez sodir bo‘ladi. 2011-yilda yuz bergan to‘qqiz balli zilzila va tsunami katta talafotlarga sabab bo‘lgan edi.
Qaynoq24.uz Xitoyning Yaponiya dengiz mahsulotlari importini yana to‘xtatgani haqida yozgan edi.
